भांगरभूंय | प्रतिनिधी
वाळपय पुलिशेची कारवाय; पावर टिलर, जनरेटर, चिरे कटींग जप्त
भांगरभूंय । प्रतिनिधी
वाळपयः गुळेली पंचायतींत मेळावली वाठारांत चलपी बेकायदो चिऱ्या खणीचेर आयतारा वाळपय पुलिसांनी धाड घालून व्हड प्रमाणार मशिनां जप्त केलीं. रातीं उसरां मेरेन कोणाचेरूच गुन्यांव दाखल जावंक नाशिल्लो. ह्या संबंदांतली तपासणी केले उपरांत आनी कागदपत्रांची तपासणी केले उपरांत संबंदितां आड गुन्यांव दाखल करतले, अशी म्हायती वाळपय पुलिसां कडल्यान मेळ्ळ्या.
मेळिल्ले म्हायती प्रमाण, मेळावली वाठारांत बेकायदो चिऱ्या खणीचो वेव्हार फाटल्या कांय दिसां सावन चालू जाल्लो. थंय लिपचोरया चिरे मारताले. थळाव्या लोकांचो विरोध आसून लेगीत ताचे आड कारवाय करिनात असो लोकांचो आरोप आशिल्लो. पुलिसांनी कारवाय करची, अशी लोकांनी मागणी लावन धरिल्ली. आयतारा वाळपय पुलीस स्टेशनाचो ताबो आशिल्ले दिवचल पुलीस निरिक्षक दिनेश गडेकार हांच्या फुडारपणा खाला धाड घातली. वाळपय पुलिसां कडल्यान मेळिल्ले म्हायती प्रमाण पांच पावल टिलर, दोन कटींग मशिनां आनी दोन जनरेटर अशीं लाखांनी रुपयांचीं मशिनां जप्त केल्यांत.
ज्या वेळार धाड घातली तेन्ना बेकायदो चिऱ्या खणीचो वेव्हार चालू आशिल्लो. पुलीस थंय धाड घालपाक पावले तेन्ना थंय काम करपी कामगार पळून गेले. हे संबंदांत आदीक तपास करतले. जंय चिऱ्या खणीचो वेव्हार चलता त्या जमीन धनया आड गुन्यांव दाखल करतले. तशेंच बेकायदो वेव्हार करपी वेवसायिका आड गुन्यांव दाखल करतले. हेच खणीचेर चालू आशिल्ले ट्रक आनी जेसीबी मशीन तपासणे उपरांत ताब्यांत घेतले, अशें निरिक्षक गडेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
