मेळत व्हय गोंयांक अस्तुरी सभापती?

भांगरभूंय | प्रतिनिधी

गोंयची राजनीत बदलता, मतदार शाणे जाल्यात, तांकांय बदल, सवस्तकाय जाय. विधानसभेचें सभापतीपद एक पवित्र पद, तें एके अस्तुरेक मेळत व्हय?

केंद्र सरकाराचे राजनिती बराबरीन गोंयची राजनीत बदलता, बदलतली. फाटल्या 15 दिसांतलें राजकारण तसो रकाद समेस्तां मेरेन पावलो. आदले कला आनी संस्कृती मंत्री गोविंद गावडे हांकां मंत्रीमंडळांतल्यान, कला अकादमी वेल्यान कुशीक काडलें तें तांच्या बऱ्या खातीर. मंत्रीपद, कला अकादमीचें अध्यक्षपद गेलें तरी गोविंदबाब आमदार आसात. आपूण भाजपाचो आमदार, मुख्यमंत्र्या बरोबर रावतलों, कला अकादमीक वाऱ्यार सोडचो ना, उडूंकय दिवचो ना हें ते दाखोवन दिवंक लागल्यात. पंडित अजित कडकडे हांकां गोमंत विभूशण पुरस्कार दितना ते माचयेर आशिल्ले. सुरवेक मात्शे अस्वस्थ उपरांत थीर हें तांचें बदलपी व्यक्तित्व पळोवंक मेळटलें ही जाणविकाय जाली. कार्यावळींत उजवाडाची दिवली तांकां दिसल्या आसतली. तातूंतल्यान एका तेंपार आंदोलनाक लागून बंदखणीतल्यान भायर सरतना लोकप्रतिनिधी जावपाची उमेद बाळगुपी गोंविदबाब विधानसभेंत दिसतले अशी आस्त आसा.
कला अकादमी ताजमहाल न्हय, हांव शहाजहान न्हय. कला अकादमी म्हळ्यार कलेचें, कला शिक्षणाचें, संस्कृतायेचें घर. ती बांदपी, सुदारपी कामगारांचे हात गोंय सरकारान केन्नाच कापून उडोवंक ना हें गोंविदबाब विधानसभेंत सांगत व्हय? फुडले देड वर्स गोंविदबाबाक विधानसभेंत, मतदारसंघांत आमदार निलेश काब्राल जावचें पडटलें. सरकारांतल्या ल्हानशा बदलांतल्यान फुडें कितें जातलें हाची उमळशीक लोकप्रतिनिधींक लोकां मदीं वाडल्या. पत्रकार जापो सोदपाचो यत्न करतात, प्रस्न विचारतात. अशाच एका प्रस्नाक जाप दितना कुडचडेंच्या आमदारान सांगलें, म्हजोय “गोविंदा” केल्लो हें हांव विसरूंक ना. तातूंतल्यान कुडचड्यार क्रियाशील जाल्ल्यान लाव म्हाका आनी भाजपाकय जातलो. हांव 2027 त परतून वेंचून येतलो हें तांणी सांगलें. गोविंदबाबांक कुशीक केला ते विशीं ही तांची प्रतिक्रिया आशिल्ली. माध्यमांनी तांचो वावर करीत रावचो, आमी आमचो करतात हीं तांचीं उतरां गोविंदबाबा खातीर देख थारुये.
मंत्रीपद आपल्याक मेळचें अशें धा बारा आमदारांक दिसतलें. गोंविदबाबाकय पर्याय आसात पूण तांचे वरी तेच हें तांकां विरोध करतल्यांकय आयज कळ्ळां.
सभापती रमेश तवडकार मंत्री जातले तेन्ना सभापतीपद कोणाक दिवप हें सरकार थारायतलें. भाजपा, मगो आनी अपक्ष आमदार सरकारांत आसात. दालें भाजपाचें जड आशिल्ल्यान सभापतीपद भाजपा आमदारा कडेन उरतलें. मागीर ते भाजपाचेर रागार जावन काँग्रेस पक्षांत वर्सां वचून भाजपांत घरा परतल्ले आमदार दिगंबर कामत आसत वा मुख्यमंत्र्यांचो विस्वास जोडपी आमदार देविया राणे आसत. देविया हांच्या रुपान पयल्यो अस्तुरी सभापती गोंय विधानसभेक मेळ्ळ्यार एक नवो इतिहास आमी घडयलो अशें सांगपाक मुख्यमंत्र्यांक अभिमान दिसतलो.
देविया उच्च शिक्षण घेतिल्ल्यो, राजकारणांतल्यो अणभवी अस्तुरी, मुख्यमंत्र्यांच्या लागसारच्या मतदारसंघांतल्यो. दिगंबरबाब हांचें व्यक्तित्वय सभापतीपदाक न्याय दिवपा सारकें आसा, ते प्रधानमंत्र्यांच्या विस्वासांतले. देविया मुळाव्यो भाजपा वांगडी.
पक्षांतर केलें तरी दिगंबरबाब गोंय भाजपाच्या पयल्या लोकप्रतिनिधींतले एक. आपल्या पुताक राजकारणांत हाडपाचे तयारेक ते लागल्यात. व्हड मार्गदर्शी म्हणून 2027 विधानसभा वेंचणुके वेळार भाजपाक उपेगी.
देविया हांकां परतून वेंचून येवपाची संद आसा. पर्यें मतदारसंघांत देविया हांचें मांव आदले मुख्यमंत्री, सभापती प्रतापसिंह राणे हांकां ती दिल्ली. भलायकी मंत्री विश्वजीत राणे हांणी पक्षांतरां केलीं, पोट वेंचणुको जाल्यो तेन्ना तांची आवय विजयादेवी, घरकान्न देविया तांचे फाटल्यान रावलीं. घरकार जिखले तेन्ना खोस परगटावपी देविया, संकश्टा वेळार घरकारा फाटल्यान, सरकारा बराबर रावपी देविया, विधानसभेंत आपल्या मांवाचे विचार फुडें व्हरपी देविया, स्वयंपूर्णा घडोवपी देविया, सभापतीपदाक वेगळी उंचाय दिवंक शकतल्यो. भाजपाची 2027 च्या राजकारणाची अस्तुरीनीत तातूंतल्यान घडटली. रानां उदरगत म्हामंडळाक नवी दिका दिवपाचे तांचे यत्न तोखणायेचो.
गोंय विधानसभेचें सभापतीपद घेवपी लोकप्रतिनिधी परतून वेंचून येना असो इतिहास आसा. आदले मुख्यमंत्री श्री. राणे हांणी तो मोडलो. डाॅ. सावंत मुख्यमंत्री जाल्ल्यान इतिहास बदल्लो. मुख्यमंत्री जावपाच्या तांकीचे अॅड. विश्वास सतरकार सभापती जाले, उपरांत वेंचून आयले ना. अंदूं नव्या भाजपा राज्य कार्यकारिणीर आयल्यात. राज्यसभेर वचपा सारकें तें व्यक्तित्व.
आदले उपमुख्यमंत्री दयानंद नार्वेंकार गोंयची राजभास कोंकणी जावपा वेळार आसले. राजभाशेचे तेय एक शिल्पकार. सभापतीपदार गेले उपरांत तांकांय मतदारांनी विसव दिलो, परतून वेंचून येवन उपमुख्यमंत्रीपदा मेरेन ते पावले. आदले आमदार राजेश पाटणेंकार हांचो आमदारकेचो कार्यकाळ सभापतीपद मेळटकच सोंपलो. तेय एक कलाकार, कला अकादमीत अजित कडकडे हांकां सलाम करपाक मुद्दम आयिल्ल्या शेंकड्यांनी दिवचलकारां बराबरीन. सभाघरांत समेस्त जावन पणजे, म्हापशें, मडगांव, सत्तरी पेडणे मेरेनचे लोक सुवाळ्याक आशिल्ले.
आदले सभापती अनंत शेट हांचे उपरांत तांचे भाव सभापतीपद आमदार प्रेमेंद्र शेट घेतले अशें दिसना. तरणाटे उपसभापती ज्योशुआ डिसोझा मंत्रीपदा खातीर बाशींग बांदून रावल्यात व्हय? म्हापशें मतदारसंघ तांकां परतून वेंचून दिवचो ना. आमदार संकल्प आमोणकार, आमदार कृष्णा साळकार, आमदार प्रवीण आर्लेकार हे भाजपाचो फुडार.
भाजपाचे कांय वांगडी सुपर ज्येश्ठत्वा कडेन पावल्यात. ज्येश्ठत्वा कडेन वतना विसर पडप, आपले भितर रावप, भलायकी इबाडप जाता. कायदो, विधिमंडळ कामकाज मंत्री आलेक्स सिक्वेरा हांची भलायकी आत्र्या पयऱ्यान इबाडटा तेन्ना तांकां मंत्रीपदार कितलो तेंप दवरप हाचो विचार सरकाराक आतांच करचो पडटलो. वीज मंत्री सुदिन ढवळीकार, येरादारी मंत्री मावीन गुदिन्हो, सहकार मंत्री सुभाष शिरोडकार, शेतकी मंत्री रवी नायक हांचीं खातीं बदलपाची गरज आसा. न्हंय येरादारी, दिव्यांग कल्याण मंत्री सुभाष फळदेसाय, पर्यटन मंत्री रोहन खंवटे हांकां बरीं खातीं दिवपाची गरज आसा. आमदार काब्राल हांकां मंत्रीमंडळांत घेवचेंच पडटलें. भलायकी मंत्री विश्वजीत राणे हांचें भलायकी खातें बदलप समा जातलें.
नुस्तेमारी मंत्री नीळकंठ हळर्णकार पासश्टींतले कामगार मंत्री बाबुश मोंसेरात हांचे बदला आमदार जेनिफर मोंसेरात हांकां मंत्रीपदार हाडप फुडारा पासत बरें.
शेतकी मंत्री रवीबाब आपलो पूत रितेश हांकां फोंडेचो आमदार करपाचें सपन पळयता आसतले. केंद्रीय मंत्री श्रीपाद नायक हांचो पूत सिद्धेश जिल्हो, भाजपाच्या राज्य कार्यकारिणीतल्यान मुखार सरपी युवा नेतृत्व. रितेश रवीबाबा परस, सिद्धेश श्रीपादबाबा परस चड शिकिल्ले. आमदार मायकल लोबो, आमदार डिलायला लोबो हांकां ओडिपींतल्यान भायर काडचें पडटलें.
गोंयची राजनीत बदलता, मतदार शाणे जाल्यात, तांकांय बदल, सवस्तकाय जाय. विधानसभेचें सभापतीपद एक पवित्र पद, तें एके अस्तुरेक मेळत व्हय?

सुहासिनी प्रभुगांवकार
9881099260