भांगरभूंय | प्रतिनिधी
कोयराची बल्ल नासतना कांय लोक मेळत थंय कोयर उडयतात. मागीर त्या जाग्याकूच कोयराच्या बल्लाचें स्वरुप येतां. हो कोयर एकठांय करपी कामगारांक खूब त्रास सोंसचो पडटा. तांणी एका जाग्यार टाकावू वस्तूं पसून सेल्फी पाँयट केलो. ताका लागून लोकांनी समाधान उक्तायलें.
पंचायती, नगरपालिका, महापालिका हांणी जायत्या जाग्यांचेर कोयराचो विलो लावपाक व्हडल्यो कोयरा पेटयो दवरल्यात. सगल्या प्रभागांनी कोयर एकठांय करपाक पालिका, पंचायतीचे कामगार भोंवतात. वांगडा कोयराची गाडीय आसता. पूण मेळटा थंय कोयर उडोवपाचे प्रकार खूब वाडल्यात. ताका लागून ह्या वाठारांनी सुणीं, गोरवांच्यो झुंडी भोवतना दिसतात. लोकांनी कोयर उडयतना स्वताचे भलायकेचोय विचार करपाक जाय. हांगा सुणीं येतात, तीं खावपाक मेळना जाल्यार लोकांचेर हल्लो करतात. हालींच शाळेंतल्या भुरग्यांचेर हल्लो जावपाचो प्रकार घडला. कोयराक लागून लोकांची भलायकी इबाडटा. मात कोयर उडोवपी लोकांक हाचें भान आसना. ते सुवार्थी जाल्यात. शिकिल्ले लोक पसून कोयर उडयतात.
पंचायत, पालिकेचे कामगार बाबडे सद्दां कोयर उखलतात, मात नागरीक कोयर उडोवप बंद करीनात. खंयूय वचात, हे कोयराचे जागे दिसतले. निदान हाचे मुखार तरी आपल्या कोयराचो विलो स्वता लावचो. तो रस्त्यार उडोवचो न्हय. हें शक्य जायना जाल्यार तो पालिका कामगारां कडेन दिवचो.
– गजानन बा. नायक भाटकार
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
