भांगरभूंय | प्रतिनिधी
अस्तंत बंगाल राज्यांत प्रशिक्षणार्थी डॉक्टर अस्तुरेक मरणा मेरेन व्हरपी अत्याचार ल्हान घडणूक न्हय. अस्तुरी अर्थकारणांत बळिश्ट, सक्षम जाता आसतना तिचेर जावपी अन्याय, अत्याचाराच्यो घडणुको वाडत आसात. अस्तुरी शरीरान आयजय दुर्बळ घटकांत आस्पावता. तिचे सुरक्षितताये पासत तिका प्रशिक्षण, शिक्षण दिलें तरी ती दादल्यां मुखार उणी पडटा, ताचे बराबरीचे लटाफटींत तिका मरण येता. डॉक्टर अस्तुरेचे जाल्ले घडणुकेचो निशेध प्रधानमंत्री नरेंद्र मोदी हांणी भारत स्वातंत्र्यदिसाच्या मुखेल भाशणांतल्यान केला. तें निव्वळ राजकारण न्हय तर एक जापसालदार मनीस, नेतृत्वान उक्तायिल्लो हुस्को. अस्तंत बंगालांत एक अस्तुरी मुख्यमंत्री आसात, तांचें सत्तेक आव्हान दिवपाचे यत्न फुडारांत अशा घडणुकांतल्यान जावपाची शक्यताय न्हयकारपाक येना. घडणुकेचेर प्रधानमंत्री आनी मुख्यमंत्री ममता बॅनर्जी हांचे विचार एकसारके आसात, तांणी आपल्या उतरांनी मेकळेपणान ते मांडल्यात. न्यायालय घडणुकेची बारीकसाणेन चवकशी करता. ती बेगीन जावची. डॉक्टर अस्तुरेक न्याय मेळचो हे खातीर यत्न जावचे. केंद्र आनी राज्य सरकारी यंत्रणांनी अती सादूर रावन तो वावर करचो पडटलो. बोवाळ, आंदोलनां, निशेध जाले तरी तातूंतल्यान लुकसाण जाता, न्यायाची मुखेल घडणुकेच्या सोदाची दिका पयसावता. अस्तंत बंगालांतले हे घडणुकेंत जाल्ल्या आंदोलनांतल्यान पुरावे शेणचे ना, ना जावचे ना हे खातीर जतनाय घेवची पडटली. वावराच्या (कामाच्या), भौशीक सुवातींनी अस्तुरेक राखण दिवपाक वा सुरक्षीततायेक म्हत्व दिवचें पडटलें, तशी कायद्यांत तजवीज करची पडटली.
2012 वर्सा दिल्लींत रातीं घडिल्ले निर्भया घडणुके परस अस्तंत बंगालातं घडिल्ली घडणूक भिरांकूळ आसा. अस्तुरेक शिक्षण, नोकरेचीं देश, विदेशाचीं दारां सगल्या मळांनी उक्तीं जातना अस्तंत बंगाला वरी राज्यांत जंय एक अस्तुरी मुखेली आसात थंय ही घडणूक घडप तिका आनी संवसाराकय चिंतेस्त करपी. घडणुकेंत पुलिसांनी एकल्याक धरिल्ल्याची जी म्हायती उजवाडाक येता ती वाचल्यार विकृत, राकेसी प्रवृत्ती आमच्या देशांत आसा हें सरकारान विचारांत घेवचें पडटलें. परतून अशी घडणूक घडची न्हय म्हणून केंद्र, राज्य पावंड्या वेल्या पुलीस यंत्रणांनी एकामेकांच्या सांगातान वावुरचें. कांय पुलीस आनी अत्याचार करपी एकामेकांक वळखतात जाल्यार थळाव्या पांवड्या वेल्या पुलिसांच्यो बदल्यो रोखड्यो जाल्यात व्हय? त्या राज्यांतल्या वेगळ्यावेगळ्या शारांतल्या लोकांक, अधिकाऱ्याक अत्याचार करपी वळखतात तांची वळेरी करून अत्याचारांत घुस्पल्ल्याची म्हायती मेळोवची, ती वाऱ्यार घालचे परस गुपीत दवरची. एका परस चड लग्नांक बंदी घालपी कायदो अस्तंत बंगाल राज्यांत लागू ना जाल्यार तो चालीक लावचो. जाल्ली घडणूक आनी उपरांत राज्यांत जाल्लें आंदोलन अत्याचार करतल्याचीं कर्तुबां बऱ्याच लोकांच्या वळखीची आसुये. अत्याचार करतल्याक फांशी जावपाक जाय अशें जेन्ना प्रधानमंत्री म्हणटात तेन्ना तांचे लागीं म्हायती आसतली. सगल्या राज्यांक दोतोरांचे सुरक्षीततायेचे आदेश केंद्र सरकारान दिल्यात. गोंयांत ते चालीक लावपा पासत पुलीस धांवपाक लागल्यात.
रातचेंच न्हय दिसा उजवाडा अस्तुरे कडेन आगळीक करपी वृत्ती बळावता तें तिच्या सक्षमीकरणांतल्यान. तिका समानताय मेळपाचे खीण लागीं येतात तशे तिचेर अत्याचारय वाडटले हे सरकारान मतींत घेवन अस्तुरी आयोगान पयलींच्या कायद्यांत बदल करपा पासत फुडें सरचें पडटलें. अस्तुरी आयोगाक राजकारणाच्या चपक्यांतल्यान भायर काडप, आयोग न्यायीक प्राधिकरणाचे अधिकार दिवप, आयोगाक केंद्रीय आनी राज्य पावंड्या वेलें प्रशासन घटमूट करप म्हत्वाचें. निर्भया मजत केंद्रां देशभर आसात? तीं सारकीं चलतात? हाचो नियाळ सरकारान घेवचो. अस्तुरेचेर जावपी अत्याचाराचेर आवाज उठोवपी अस्तुरी संघटणा, केंद्रां आसात पूण कितलीं विश्वास जोडूंक पावल्यांत, कितलीं दादल्यांची मानसीकता बदलापा पासत वावुरतात?
अस्तुरेचें बळिश्टपण सोंसपाची तांक कांय दादल्यां भितर नासतली हें लक्षांत घेवन ल्हानपणा सावन तिका घर ते देवूळ आनी कामाचे सुवाते मेरेन समानताय मेळची हे विशीं कायदे करचे पडटले. समानताय फक्त कागदार आसची न्हय, ती समाजाच्या दर मळा मेरेन पावची, दिसची, चालीक लागची हे खातीर यंत्रणांक वावुरचें पडटलें.
फाटल्या 20 ते 25 वर्सांत अस्तुरे विशीं कायदे जाल्यात, बदलय जातात पूण अस्तंत बंगाला वरी घडणुको जातकच यंत्रणा जाग्यो जातात. त्या यंत्रणांतले उणेपण पयसावपा पासत समित्यो जातल्यो, चवकशी जातल्यो. कांय तेंपान यंत्रणा सुस्तेल्यो अशें जावचें न्हय हे खातीर सरकारान सगल्या मळांनी अस्तुरेचे सुरक्षीतताये पासत वातावरण निर्मणी करची. शाळां, म्हाविद्यालयांतल्यान विद्यार्थीनी, शिक्षिकांक येरादारी ते वर्गा मेरेन, मेकळे सुवातींतय राखण मेळपाक जाय. गोंयांत अस्तुरे पासत बशीनी आशिल्ले राखीव जागे दादले बळकायतात. लेडीज ओन्ली यंत्रणा व्हड प्रमाणांत जाय, टॉयलेट ते येरादारी मेरेन. बाजार ते दुकाना मेरेन अस्तुरेक मेकळेपण मेळचें, समानताय मेळची ही मानसीकताय शिकोवपी, सांगपी तक्टे जाय.
तिचें देखणेपण प्राकृतीक आनी दर एका मळा वयल्या उदरगतींतले कांय वेळा तिका स्राप थारता. संविधानाच्या रुप्या उत्सवी वर्सांत तिका मेळपी समानतायेंतल्यान तिचे आड समाजांत नसाय हाडटा? अस्तंत बंगालातलें घडणुकेचो विंगडविंगड नदरेन गिन्यांना कडल्यान नियाळ जाल्यार विकृतीची मानसीकता कळूंक शकता. चडांत चड अस्तुरेचो आसपाव गिन्यांना मदीं जावंक शकता. हेर राज्यांतले उंचेल्या पावंड्या वेले अस्तुरेक, अस्तुरी खासदारांक ह्या वावरांत घेवचें. राज्यसभेच्यो पत्रकार खासदार सागरीका घोष, महिला आयोगांत कामकाज केल्ल्यो खासदार स्वाती मालीवाल पळोवणी, उलोवणी करून रिपोर्ट दिवंक शकतात.
आगळीक, अत्याचार जाल्ले अस्तुरेचे मिडियांतल्यान मेळपी चित्र, आवय बापायचें म्हणणें दिवप पुलिसांच्या सोदकामांत आडमेळीं थारचें न्हय. कायद्यान अत्याचार, आगळीक जाल्ले अस्तुरेचें नांव, गांव दिवपाक नियंत्रणा घाल्यांत, तीं चालीक लागना जाल्यार कारवाय जावची. मिडियाक अस्तुरे विशींच्या कायद्याचेर जागे करपी प्रशिक्षणसत्रां गरजेचीं.
अस्तंत बंगालांत जाल्ले घडणुके कडेन संवेदनशीलतायेन, बारीकसाणेन, तटस्थ नदरेन पळेल्यार फुडारांत तसल्यो घडणुको घडच्यो न्हय हेखातीर मिडियाची मजत जातली. खबरां वयलो विस्वास शेणचो न्हय हाची जतनाय घेतल्यार, अस्तुरेक न्याय मेळपाकच जाय म्हणून कामकाज केल्यार, राजकारण पयस दवरल्यार अस्तुरेक सुरक्षीतताय मेळटली.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
