भांगरभूंय | प्रतिनिधी
आपुण मेल्या उपरांत आपल्याक याद उरपा सारकें कितें तरी ह्या संवसारांत आसूंक जाय. निदान एखाद्या मनश्याक जितें आसतना अशें दिसूंक तरी जाय. तो मागीर ताचो सभाव आसत, ताचें काम आसत, ताची सामाजीक जीण आसत वा ताचें ह्या भुयेंर कसल्याय प्रकारचें योगदान आसत. पूण, कसल्या तरी बऱ्या वावरा खातीर ह्या ह्या समाजान ताची याद काडूंक फावो. जेन्ना जेन्ना हांव एखादें मरण पळयतां तेन्ना म्हाका आनीक एक गजाल जाणवता. एखादो मनीस गेल्या उपरांत ताच्या भोंवतणच्या मनश्यांनी आनी खास करून समाज म्हूण आमी सगळ्यांनीच अश्याच तरेचे यादींत उरपा सारकें वर्तन करप हीय आयच्या काळाची गरज न्हय?
काल समाज वावुरपी राजा कारापुरकार हांच्या निमण्या संस्कारा वेळार मनांत हजार विचारांनी घर केलें. गोंया खातीर वावुरपी एक तळमळीचो मनीस गेलो. सगळेच हळहळे. सगळ्यांक वायट दिसले. पूण गेले उपरांत ताच्या घरच्यांनी घालून दिल्ली देख महत्वाची. ताचे सगळे निमणे संस्कार ताची घरकान्न राजश्री बांदोडकार कारापुरकार हिणें केले. सांगाता तांच्यो अपुरबायेच्यो दोन धुवो.
समाज वावुरप्यांच्या घरांत असले निर्णय घेवप सोंपे आसता अशें खूब जाणांक दिसता. पूण ते तितलें सोंपे नासता हें तांच्या सांगाता आशिल्ल्यांक खबर. मरण हरशींच घरांत एका तरेचो आव्हानाचो प्रसंग घेवन येता. तातूंत समाजाक पटना अश्या तरेचे निर्णय घेवप आनी तांचेर ठाम रावप हे भोव कठीण काम. अश्या वेळार कोण कितें सांगता, कोणाचो अहंकार दुखावता, कोणाच्यो कसल्यो रितीभाती वयर सरतात हाका हिशोब आसना. अश्या वेळार घरचीं सोडाच, विधी करपाक आयिल्लो भट लेगीत फुगार जावन बसता. ताणेंय बाबड्यान अशें कितें जावं येता हे केन्ना येवजिल्लेंच आसना. पूण ह्या सगळ्याक तोंड दीत राजश्री बायन काल सगळे अंत्यसंस्कार पार घाले. दोळ्यांतली दुकां आनी काळजांतले दुख्ख सांबाळत सगळे जावन ती भायर आयली तेन्ना आपल्या भावनांक वाट करीत तिणे एकूच म्हळें, ‘म्हजो मनीस म्हाका परत मेळचो ना’ आनी तिच्या दुकांचो बांद फुटलो.
राजश्री बायच्या दुकांचो बांद फुटलो तेन्ना एक गजाल कुच्च करून काळजाक घाय करून गेली. अशे दुकांचे बांद फुट्टात तेन्ना केन्ना केन्ना ह्या समाजाक खुबदां कसलोच पाजर फुटना काय? आयज मडगांवच्या त्या स्मशानभुयेंत आयिल्ले चडशे लोक तशें सामाजीक फांटभुयेचे. कोणाच्यो भोंवयो वयर सरल्यो नात. सरल्याय जाल्यार हेरांक पळोवन तांणी स्वताच्या मनाचेर ताबो दवरला जातलो. स्मशानांत बायलो निखट्यो आयल्यार लेगीत तांकां तिरकस नदरेन पळोवपी ह्या समाजान ना म्हळ्यार बरीच प्रगती केल्या म्हणपाची. पूण होच समाज आयजूय गोंयातल्याच एका दुसर्या कोनश्यांत आपल्या घोवांक वगडावपी बायलांक अतिशय तुच्छ आनी मनीसघाणी वागणुक दिता हेंय सत्य आमी न्हयकारपाक शकतात व्हय? आयजूय तिची कांकणा फोडटात, तिचें कुकूम पुसतात, तिचेर थंड उदकाचे कोळशे ओंततात आनी एक मडें घरांतल्यान भायर सरतना आनीक एक जिवें मडें घरांत भितर सरता. हें आयजुय जाता म्हूण विचारपी आनी म्हजे कडेन वॉटसएपाचेर वाद घालपी जायते तरणाटे म्हाका मेळटात, पूण हें घडटा हें खरें. कित्याक अजुनय आमकां बायलेचे स्वतंत्र अस्तित्व मानून घेवपाक त्रास पडटात. एका वटेन स्वताच्या घोवाचे निमणे संस्कार करपी एखाद्या बायलेच्या धैर्याचे कवतुक करपी आमी आमच्याच गोंयात दुसरे कडेन एका बायलेचें अस्तित्वच ना करपाक फाटी फुडें लेगीत जायनात. आनी गजाल फकत रितींची ना. ह्यो रिती केल्यो ना म्हूण हो समाज प्रगतीशील जाला अश्यांतलोय भाग ना. एखाद्या विधवे कडेन पळोवपाची आमची नदर बदल्ल्या व्हय? घोव आसतना वागयतालीं तशीच तिका आमी वागयतात व्हय? घरांतल्या समारंभांनी, लग्न कार्यांनी, सणा परबांनी तिका सदचेंच स्थान मेळटा व्हय? आनी मागीर हें सगळें नाकाच म्हूण सुरवातीच्यान लग्नाच्यो आनी लग्ना कडेन संबंदीत रिती, सौभाग्याची प्रतिकांच एखादी बायल मोखून मारता तेन्ना कितें अधिकार आसा ह्या समाजाक तिचे कडेन बोट दाखोवपाचो? तिका ह्या निर्णया मेरेन घेवन येवपी तुमीच न्हय आनी तुमचे बुरसट विचार? आयज बायलांनी खूब प्रगती केल्या म्हूण हड्डे बडोवन सांगपी सामाजीक संघटना, राजकीय पक्ष आनी शिकील्ले सवरिल्ले आमी लेगीत अश्या वेळार मूग गिळून ओग्गी बसतात. आमच्यो संवेदना तेन्ना खंय ना जातात कोण जाणा…
मरण हे जिणेचें परम सत्य. ताका भिवपी खूब जाण आसतात. पूण तें कोणाक चुकना. मात ह्या मरणा मेरेनची वाट, ताच्या उपरांत मेल्ल्या मनशाच्या घरच्यांची वाट आनी सगळ्यांत महत्वाचें म्हळ्यार ह्या समाजाच्या उत्कर्शाची वाट मात आमी निश्चीत सुखदायी करपाक शकतात. ते करतले जाल्यार राजश्री बाय सारकेल्ल्यांक फकत वा! म्हूण उपकारचें ना. तिच्या सारकेल्ल्यांची देख घेवन आमकांय एक पावल मुखार मारचे पडटलें. ह्या समाजाक लागिल्ली वायटी मुळां सकट हुमटून काडची पडटली. ह्या समाजाच्या बऱ्या खातीर…
अन्वेषा सिंगबाळ
9923442746
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
