‘मेराकी, बाय द सी’ः दायज राखपी गोंयच्या फेस्तकाराची जीण

भांगरभूंय | प्रतिनिधी

पणजीः गोंयचें दायज मनोवपी आनी फुडें व्हरपी गोंयचो फेस्तकार मारीयस फर्नांडीस हांचे जिणेचेर आदारीत मेराकी, बाय द सी हो एक म्हायतीपट आसा. गोंयांत 99 फेस्तां मनोवपी मारीयस हांचे भुरगेंपण तें गोंयचो फेस्तकार मेरेन जावपाचो प्रवास ह्या म्हायती पटात विस्तारान मांडला.

हिमांशू सिंघ हांणी दिग्दर्शीत केल्लो आनी डॉ. ग्वेनदोलीन दे ओर्नेलास हांणी निर्मीती केल्ली मेराकी, बाय द सी परंपरेक तिगोवन दवरपी फेस्तां कशीं विशिश्ठ पद्दतीन मनयतात हाचेर उजवाड घातला. परंपरे पासत पयस वचून कांय फेस्तांनी आनी उत्सवांनी आतां सोरो आनी अस्तंती संगितानी आतां आपली सुवात घेतल्या. पूण आदले गोंयपण मारीयस हांणी फेस्तांनी कशे परतून हाडलें हाचेर काय तज्ञ आपलीं मतां मांडटांत.

चित्रपटाचे सुरवेकच मारीयस हे स्वताची भुमिका निभावन आपले जिणेच्या प्रवासाचें वर्णन करतात. केनिया देशांत जल्माक आयिल्ले मारीयस हांचो भुरगेपणाचो प्रवास गोंयांत कसो सुरू जालो आनी युके हांगासर कामाक लागले उपरांत 1991त तांची गोंयांत परतून घरवापसी जावन गोंयचो फेस्तकार कसो नांवरुपाक आयलो ही काणी जावन आसा.

ह्या वेळार गोंयचें दायज, सैम आनी संस्कृती फेस्ताच्या माध्यामांतल्यान तांणी तिगोवन तशेंच फुडें व्हरपाचो यत्न केलो. 2000 वर्सा मातयेचें फेस्त, बायलांचें फेस्त, भुरग्यांचें फेस्त, पणसाचें फेस्त, नाचण्याचें आनी हेर तरांचीं फेस्तां घडोवन हाडून तांणी बायलांक, दिव्यांग व्यक्तीक उर्बा दिली तशेंच परंपरीक संगीत, नाच, खाणां, जीण तांणी जिवेशी केली.

फेस्त घडोवन हाडटलो जाल्यार पयशे जाय पडटात. ताचे खातीर स्पोन्सर जाय पडटात, चड पयशे दिता ताका मुखेल सोयरो म्हूण आपोवचो पडटा, फेस्ताक सोरो आसल्यार लोक आकर्शीत जातात. पूण मारीयस हांणी कोणाच कडेन स्पोन्सराचे पयशे घेनासतना, सोरो विकनासतना, कोणाकच मुखेल सोयरो हाडिनासतना येसस्वी रितीन हीं फेस्तां लोकांनी हावसफुल्ल करुन मनयल्यांत.

कसलोच अर्थीक आदार नासतना हीं 99 फेस्तां तांणी कशीं मनयलीं हाचेर मारीयस हांणी उजवाड घातला. तशेंच 100वें फेस्त मनयले उपरांत मारीयस हांणी विसव घेवपाचें थारयलां. पूण तांणी 100 परस चड फेस्तां करचीं अशीं मागणी बरें मागप्यांची आसा. पूण ते 100चो आंकडो हुपतले? असो प्रस्न हो म्हायतीपट उपस्थीत करता.