भांगरभूंय | प्रतिनिधी
म्हापशें, प्रतिनिधी: मेस्ताभाट मेरशेच्या फ्लॅटांतल्यान ५ लाखांच्यो भांगराच्यो वस्ती चोरिल्ल्यान पोरणें गोंय पुलिसांनी दुबावीत काशीबाई लक्ष्मीकांत नायक (३४, रा. कांदोळे आनी हिप्पार्गी कर्नाटक) हे वावराडेक अटक केली. तशेंच तिचे कडल्यान चोरी केल्ल्यो भांगरा वस्ती जप्त केल्यो.
ही चोरयेची घडणूक मंगळार १२ नोव्हेबराक सांजेवेळार सुमार ६.३० वरां आदीं घडिल्ली. हे विशीं सिडनी मेसीर हांणी पुलिशेंत कागाळ नोंद केल्ली. अबनेर रेसिडेन्सी इमारतींतल्या एका फ्लॅटांत दुबावीत कागाळदारा कडेन वावराडी म्हणून कामाक आशिल्ली.
दुबावितान कागाळदाराचे आवयची आलमार उगडली. आलमारींत आशिल्लीं भांगराचीं ६ काकणां, एक गळ्यांतलो हार आनी एक मुदी, अशे ५ लाखांच्यो भांगरा वस्ती चोरल्यो. हो प्रकार त्याच दिसा रातीं फिर्यादीचे आवयक कळ्ळो. तिणें वावराडेचेर दुबाव उक्तायलो. ते प्रमाण तिचे आड सिडनी मेसीर हांणी पुलिशेंत कागाळ केली.
हे कागाळीच्या दाराचेर पुलिसांनी दुबावीत आरोपीक कांदोळेच्यान अटक केली. तशेंच तिचे कडल्यान चोरिल्ल्यो सगळ्यो भांगराच्यो वस्ती जप्त केल्यो. फुडलो तपास पुलीस उपनिरीक्षक जस्विता नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
