भांगरभूंय | प्रतिनिधी
म्हापशें : मेरशी २०१९ वर्सा जाल्ल्या लक्ष्मीबाई वेर्लेकार (६९) हिच्या सदोश मनीस बळी प्रकरणांत तिचो पूत संदीप वेर्लेकार हाका स वर्सां स म्हयन्यांची सश्रम बंदखणीची ख्यास्त मेरशेच्या उत्तर गोंय जिल्लो सत्र न्यायालयाचे न्यायाधीश ईर्शाद आगा हांणी दिली.
प्रकरण कितें?
ही ख्यास्त भा. न्या. संहितेच्या ३०४ (२) कलमा खाला न्यायालयान दिली. ह्या प्रकरणांत पोरणें गोंय पुलिसांनी १९ नोव्हेंबर, २०१९ दिसा गुन्यांव दाखल केल्लो. संदीप वेर्लेकार हो १८ नोव्हेंबर, २०१९ सांजेवेळार ८ वरांचेर सोरो पियेवन घरा आयलो. उपरांत तांणी दुयेंत आशिल्ली आपली आवय लक्ष्मीबाई हिका तिडकीन मारली. तेन्ना कुटुंबांतल्या वांगड्यांनी तिची आरोपी कडल्यान सुटका केली. उपरांत रातीं सुमार ९ वरांचेर आरोपीन घरांत न्हिदिल्ले आवयक परत येवन मारली आनी तिका ओडीत वर्हांड्यांत हाडली. तिणें बोवाळ केले उपरांत घरांतले हेर वांगडी धांवत आयले. तेन्ना आरोपी थंयच आशिल्लो, उपरांत तिका गोमेकॉंत व्हेली. थंय तिका दोतोरांनी मरण आयिल्ल्याचें सांगलें.
ह्या प्रकरणांत पोस्टमार्टमा उपरांत अहवाल आयले उपरांत तेन्नाचे पुलीस निरीक्षक कृष्णा सिनारी हांणी आरोपी संदीप वेर्लेकार हाचे आड खुनाचो गुन्यांव दाखल करून अटक केली. तपास पुराय जाले उपरांत २५ फेब्रुवारी २०२५ दिसा सत्र न्यायालयांत आरोपपत्र दाखल केलें. न्यायालयान प्रथमदर्शनी पुराव्याची दखल घेवन २४ सप्टेंबर, २०२१ दिसा आरोप निश्चीत करून खटलो सुरु केलो. ह्या प्रकरणांत प्रकरणी न्यायालयान सबळ पुराव्यांची दखल घेवन प्रत्यक्षदर्शी साक्षीदार नाशिल्ल्यान आरोपी संदीप वेर्लेकार हाका सदोष मनीस बळीच्या आरोपा खाला दोशी थारायिल्लें. न्यायालयांत सरकारी अभियोक्ता अनुराधा तळावलीकार आनी रॉय डिसोझा हांणी बाजू मांडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
