भांगरभूंय | प्रतिनिधी
लुधियाना, खबरां संस्था : कांय म्हयन्यां आदीं उत्तर प्रदेशांतल्या मेरठांत जाल्ल्या सौरभ राजपूत खून प्रकरणांत देशभर बोवाळ निर्माण जाल्लो. सौरभाची बायल मुस्कान आनी तिच्या इश्टान सौरभाक मारून उडयलो आनी ताची कूड काँक्रिटान निळ्या ड्रमांत घालून पुरली. हाचे उपरांत निळो ड्रम चर्चेचो विशय जावपाक लागलो. आतां पंजाबांतल्या लुधियाना हांगाय अशीच एक केस उजवाडाक आयल्या. निळ्या रंगाच्या ड्रमांत एक कुशिल्ली कूड मेळ्ळी. ते कुडीचे पांय आनी मान बांदिल्ली. देखून हें खुनाचें प्रकरण आशिल्ल्याचो दुबाव आसा. ही कूड कुशिल्ल्यान भोंवतणी घाण पातळिल्ली. थळाव्यांनी हे विशीं पुलिसांक म्हायती दिली.
थळावे पुलीस मुखेली कुलवंत कौर हांणी सांगलें, एक कूड निळ्या रंगाच्या ड्रमांत प्लास्टीक पोतयेंत गुठलायल्ले अवस्थेंत सांपडल्या. ही जाची कूड आसा तो स्थलांतरीत मजूर आशिल्ल्याचो अदमास आसा. मरण आयिल्ल्याच्या आंगार कसलेच तरेच्यो जखमो नात. पोस्टमार्टमा उपरांत मरणाचें नेमकें कारण समजतलें अशें तांणी सांगलें.
पुलिसांनी ह्या प्रकरणाचो तपास सध्या सुरू केला. लुधियानांतल्या ४२ ड्रम उत्पादकांनी वळेरी तयार केल्या. तशेंच जंय ड्रम सांपडला थंयचे सिसीटीव्ही कॅमेरे पुलीस तपासतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
