भांगरभूंय | प्रतिनिधी
भांगरभूंय । प्रतिनिधी
पणजीः बांबोळे-कुडका वाठारांत मेगा प्रकल्पांचीं बेकायदो बांदकामां आनी बेकायदो बस्ती विशीं जाप विचारपा खातीर थळावे आमदार विरेश बोरकार हांणी आरजीच्या (रेव्ह्युलेशनरी गोवन्स) वावुरप्यां सयत कुडका-बांबोळे पंचायतींत आंदोलन केलें. आंदोलनाची खबर मेळटाच सरपंच आनी सचिव गायब जाल्ल्याचो आरोप आमदार बोरकार हांणी केलो.
सोमारा सांजे आमदार विरेश बोरकार हांणी बांबोळे दर्यादेगेर ग्रँड हयात फाटल्यान दर्यांक तेकूंन चल्लिल्ले काँक्रिटाच्या राखणे वणटीचें काम बंद उडयल्ले. ह्या कामा सयत हेर बांदकाम प्रकल्पांक पंचायतीन परवानगी दिल्या काय ही जाप विचारपा खातीर बोरकार हांणी पंचायतीन मोर्चा व्हेलो. ह्या वेळार आरजीपीचे मुखेली मनोज परब हजर आशिल्ले.
काँक्रीट वणत बांदप चालू आशिल्ल्या कामाचेर पंचायत कसलीच कारवाय करना. पयली दोन फावट हे काम हांवें बंद केल्ले पूण सोमारा तें परत सुरू केलां, असो आरोप बोरकार हांणी केलो. धड परवानगी नासताना काँक्रिटाची वणत बांदतात. हे विशीं सोमारा गोंय दर्यादेग वेवस्थापन प्राधिकरण संचालका कडेन म्हजें उलोवप जावन हांगासर बेकायदेशीर बांदकाम चलता अशें तांकां सांगिल्लें. हाचेर उल्लंघन करप्यांक स्थगिती वा कारणां दाखयात नोटीस काडपाचे आश्वासन तांणी म्हाका दिल्ले. ही नोटीस खऱ्यांनीच पावला कांय हे आता पळोवपाचे आसा, अशें विरेश हांणी सांगलें.
बांबोळे आनीक एका हॉटेल प्रकल्पाचें बांदकाम चालू आसा तांकां कशी परवानगी दिल्या हाची जाप आमी विचारपाक आयिल्ले. पूण हांगासर सरपंच आनी सचिव गायब जाल्यात. आमी येवपाचे आसात ही खबर खंयच्यान तरी तांकां पावल्या आसत म्हूण हे दोगूय अचकित नाच जाल्यात, असो आरोप विरेश हांणी केलो.
व्हडल्या व्हडल्या बांदकामांक परवानगी दिवच्यो न्हय असो थाराव आमी ह्यान पयली ग्रामसभेत घेतिल्लो पूण पंचायत परवाने दित सुटल्या देखून गांवांत उदकाची व्हडली समस्या निर्माण जाल्या. हेच भशेनचो थाराव आतां आमी सात पंचायतींनी मांडटले. आमी गोंयकारांनी जागृत रावन हांकां विरोध करपाची गरज आसा, असो उलो विरेश हांणी मारला.
मेरशे बेकायदेशीर झोपडपट्टी आड 2022 त कागाळ नोंद करून मोडून उडोवपाची मागणी केल्ली. हे विशीं मामलेदार आनी उपजिल्लोधिकाऱ्यांकडे सुनावणी घेवन कारवाय करपाचे सांगिल्लें. पूण आतां सद्या उच्च न्यायालायाच्या आदेशा प्रमाण ही झोपडपट्टी मोडप सक्तीचें आसा. पूण आतां मेरेन ह्या झोपडपट्टीचो अहवाल पावूंक ना अशें गट उदरगत अधिकाऱ्यांक विचारले उपरांत स्पश्ट जाले. व्होटबँक राजकाराणांक लागून भायल्यांक राखण दिवपा खातीर हे चालू आसा, असो आरोप विरेशान केलो.
जर विरेश हांकां नासलेलो जाल्यार तुमचो मतदारसंघ पाड पडपाचो, असो दावो मनोज परब हांणी केला. तुमची घरां व्हांवून वचपाची आनी दोंगर घरांनी घुसपाचे. कुडका दोंगरा वयर जी मातीं आमदार रुडोल्फ फर्नाडीस हांणी घाल्ली ती व्हांवून लोकांच्या घरांनी गेल्या. तुमी दोगंराचे सकयल रावतात. जाण्ट्यांनी हे दोंगर राखून दवरिल्ले. जर हे दोंगरांचे लुकसाण जाले जाल्यार तुमची घरां व्हावून शेतांनी पावतलीं, अशीं शिटकावणी परब हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
