भांगरभूंय | प्रतिनिधी
डाॅ. प्रमोद सावंत
मुख्यमंत्री, गोंय
मानादिक प्रमोदबाब,
तुमचें अभिनंदन करपाची आनीक एक संद घेतां. देसांतल्या प्रभावी व्यक्तीमत्वाच्या वळेरेंत तुमी पावल्यात ही गोंयकारांक व्हडा अभिमानाची गजाल. तुमी कूस बदलतात हें ज्ञानपीठकार दामोदर (भाई) मावजो हांचे बराबरीन गोवा कोंकणी अकादेमीचे कार्यावळीक हजर रावील्ले तेन्ना होलमल्लें. तुमी जेन्ना राजभास कोंकणीची व्हडवीकाय सांगतात तेन्नाच तुमी व्हड जातात, व्हड जातले हें भाईन तुमकां सांगलां आसतलें.
गोंयचेंर आयिल्ल्या मायग्रेशनाच्या अरिश्टा कडेन झुजपाक राजभास, आवयभास होच उपाय तुमी आतऱ्या- पयऱ्यान सांगपाक लागल्यात तेन्ना समेस्तांक मुख्यमंत्री सांगतात तें सत हाची जाणवीकाय जावपाक लागल्या.
फुडलीं दोन वर्सां गोंयाक मेगा घरां बांदपाचे प्रकल्प नाकात, हो एक ल्हानसो निर्णय घेयात. प्रधानमंत्री आवास येवजण चालीक लावचीच, तीन चार मजल्यांच्यो बिल्डिंगो बांदून. गोंयची स्कायलायन (क्षितीज) शेणल्यार आमकां तुमकां निळें मळब पळोवंक मेळचें ना. मळबाचें म्हत्व तुमचे धुवेक तुमी सांगलां. एक मतींत दवरात, तुमची धूव बारावेक पावता तेन्ना तिका आपलो पापा देसांतले प्रभावशाली व्यक्तींचे वळेरेंत पावला हें आदींच कळ्ळां आसतलें. तुमची धूव फुडले पिळगेचें प्रतिनधीत्व करपी, विज्ञान आनी तंत्रगिन्यानाची वाट धरपी. तुमचे परस ती प्रभावी जातली, शिक्षणान आनी व्यक्तीत्वान! तिका उगतें मळब म्हणल्यार कितें, फुडें कशें वच्चें, वाटेर फातर, कांटे खंयचे आसात हें तुमी तिका सांगलां आसतलेंच. आदली मुख्यमंत्री शशिकलाताई काकोडकार हांचेवरी तुमची धूव तुमची व्हडवीकाय एक दीस सगल्यांक सांगतलीच.
हवामान वेगीं बदलतना भांगरभुंयेंतल्या समेस्त धुवां, पुतां खातीर मेगा प्रकल्प सद्या नाकात, ह्या निर्णयान फुडें वचप तुमकां लाभाचें, 2027 त 27 खातीर.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
