भांगरभूंय | प्रतिनिधी
पणजी ः राज्यांत येवपी मेगा प्रकल्पांक मान्यताय दिवपाचो अधिकार हाचे फुडें नगर नियोजन खात्याच्या (टीसीपी) मुख्यमंत्र्याच्या फुडारपणा खालचे सुकाणू समिती कडेन आसतले. हे संबंदीची अधिसुचोवणी रोखडीच जारी जातली अशें मुख्यमंत्री डॉ. प्रमोद सावंत हांणी प्रुडंट न्यूज चॅनलाचेर ‘हेड ऑन’ कार्यावळींत उलयतना स्पश्ट केलें.
‘टीसीपी’ खात्या खाला आशिल्ल्या वेगवेगळ्या समित्यांक घटमूट करप गरजेचें आशिल्लें. कांय वाठारांतले नागरिक थंयच्या नियोजीत मेगा प्रकल्पांक खर विरोध करतात. अशे स्थितींत संबंदीत वाठारांचो आनी थंयच्या नागरिकांचो विचार करुन मेगा प्रकल्पांचो विचार करप गरजेचें आसा. देखूनच मेगा प्रकल्पांक मान्यताय दिवपाचो अधिकार टीसीपीचे मुख्यमंत्र्याच्या फुडारपणा खालचे सुकाणू समिती कडेन दिल्यात. हाचे फुडें हीच समिती सविस्तर अभ्यास करून मेगा प्रकल्पांक मान्यताय दिवपाचो निर्णय घेतली अशेंय मुख्यमंत्र्यांनी म्हणलें.
1971 वर्सा पयलीं घरां नांवार करपाचे यत्न
मूळ गोंयकारांचें घर ताच्या नांवार जावपाकूच जाय. 1971 वर्सा पयलीं घरां बांदिल्ल्यांक 300 चौखण मिटर जमनीची मालकी दिवपाचो सरकार यत्न करता. तशेंच न्यायालयाच्या आदेशा प्रमाण, सरकारी, कोमुनिदाद जमनी आनी म्हामार्गां लागसार बेकायदेशीर बांदकाम मात्तूय सोंसचे नात अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
