भांगरभूंय | प्रतिनिधी
मेंदवाचो आघात (ब्रेन स्ट्रोक) हें एक सामकें घातक दुयेंस. हाचेर वेळार उपचार केलो ना जाल्यार मरण येवपाचो धोको आसता. उदासीनताय हें मेंदवाचो आघात जावपाचें मुखेल कारण. फाटल्या तीन वर्सांत कोरोना महामारीच्या काळांत मेंदवाचो आघात दुयेंतींचो आंकडो नेटान वाडत आसा. भारतांत मेंदवाच्या आघाताक लागून दर 4 मिनटांनी एक मनशाक मरण येता. हांतूंत तरणाट्यांचो आकडो चड आशिल्ल्याची म्हायती ऑल इंडिया इन्स्टिट्यूट ऑफ मेडिकल सायन्सेसचे (एम्स) न्यूरोलॉजिस्ट प्रोफेसर एम. व्ही. पद्मा श्रीवास्तव हांणी दिल्या.
दर 40 सेकंदाक एका मनशाक मेंदवाचो आघात जाता आनी दर 4 मिनटांनी एका मनशाक मरण येता. हाका लागून मेंदवाचो आघात हो देशांत मरण येवपाचें दुसरें मुखेल कारण थारता. तशेंच देशांत दर वर्सा सुमार 1 लाख 85 हजार मेंदवाच्या आघाताचे दुयेंती सांपडटात, अशें डॉ. श्रीवास्तव हांणी म्हणलें. सर गंगाराम हॉस्पिटलांत आयोजीत केल्ले कार्यावळींत तांणी भारतांतल्या मेंदवाच्या आघात दुयेंसाची स्थिती कशी आसा, हाची म्हायती दिली.
ग्लोबल बर्डन ऑफ डिसीज (जीबीडी) प्रमाण भारतांत मेंदवाच्या आघाताचे दुयेंती सगळ्यांत चड आसात. हें प्रमाण 68.6 टक्के आसा. मरण येवपाचें प्रमाण 70.9 टक्के आसा. हाचे भायर 77.7 टक्के दुयेंती शारिरीक अपंगत्वाचे आसात. ही आंकडेवारी भारता खातीर चड भिरांकूळ आसा. 5.2 दशलक्ष म्हळ्यार 31 टक्के मेंदवाच्या आघाताचे दुयेंत 20 वर्सां सकयल्या भुरग्यांक जाता. भारतांत तरणाटे आनी मध्यम पिरायेच्या भुरग्यांक मेंदवाचो आघात चड जाता. ही आंकडेवारी भिरांकूळ आसली तरी देशांतल्या पयशिल्ल्या वाठारांनी फावो ती उपचार सुविधा ना. देशभरांत खास करून सरकारी हॉस्पिटलांनी मेंदवाच्या आघाताचेर उपचार करपाचे ठोस उपाय नात.
मजगतीं, पयशिल्ल्या वाठारांनी आघात उपचाराच्या उणावाचेर उपाय काडपा खातीर तंत्रगिन्यान हो एक सोंपो मार्ग. हातूंत आमी टेली स्ट्रोक आनी टेलीमेडिसीन आपणावन मेंदवाचो आघात जाल्ल्या दुयेंतींची जतनाय घेवंक शकतात. ताच्या आदारान आमी देशांतल्या पयशिल्ल्या आनी गरीब वाठारांनी पावूंक शकतात अशें मत डॉ. श्रीवास्तव हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
