भांगरभूंय | प्रतिनिधी
चॅम्पियन्स लीग 2023चो वस्ताद मॅन्चॅस्टर सिटीन पॅनल्टी शुटआवटांत युरोपा लीग चॅम्पियन सेव्हिला क्लबाक हारोवन पयलेच खेपे यूईएफए सुपर कप सर्त जिखली.
अॅथेन्सच्या कारासाकीस स्टेडियमाचेर जाल्ले फायनलीचो निकाल पॅनल्टी शुटआवटाचेर लागलो. पुर्ण वेळाच्या खेळांत दोनूय क्लब 1-1 अशे बरोबरींत आशिल्ले. मॅन्चॅस्टर सिटीन पॅनल्टी शुटआवटांत सेव्हिला क्लबाक 5-4 अशा फरकान हारोवन सुपर कप सर्त जिखली.
सेव्हिलाच्या युसेफ एन-नेसिरीन 25व्या मिनटाक उत्कृश्ट रितीन गोल करून क्लबाक आघाडी मेळोवन दिल्ली. जाल्यार 63व्या मिनटाक कोल पामरान हेडर वरवीं गोल करून बरोबरी मेळोवन दिली. मॅच 1-1 अशी बरोबरींत उरिल्ल्यान निकाल लावपाक टायब्रेकराचो आदार घेवचो पडलो.
बार्सेलोना, मिलान आनी रियाल माद्रीद ह्या क्लबांनी ही सर्त दरेकी पांच खेपे जिखल्या.
यूईएफए सुपर कप सर्तीचो हो 48वो हंगाम. 1973त सर्तीक सुरवात जाल्ली. युरोपीयन युनियन ऑफ फुटबॉल असोसिएशन (यूईएफए) वरवीं सर्तीचें आयोजन जाता. हातूंत फकत एकूच मॅच जाता. ही मॅच यूईएफए चॅम्पियन्स लिगेचो जैतिवंत आनी यूईएफए युरोपा लीग ह्या पंगडां मदीं खेळयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
