भांगरभूंय | प्रतिनिधी
खबरां संस्था
पल्लेकेलेः भारत आनी पकिस्तान हांचे मदली आशिया कप सर्तीतलीं मॅच शेनवारा पावसाक लागून रद्द करची पडली. भारतान आपल्या डावांत 266 धांवड्यो केल्लो. पावसाक लागून पाकिस्तानाक आपलो डाव सुरू करपाक मेळ्ळो ना. दोनूय पंगडांक दरेकी एक गुण दिवंन मॅच रद्द करची पडली. मॅच रद्द करपाची पाळी वनन-डेंत ही 44व्या फावट आयल्या. जेन्ना भारताची मॅच रद्द जाली. हे बाबतींत भारतान आपल्या नांवार संवसारीक विक्रम केला. भारताचो रद्द जाल्ली ही 24वी मॅच आसा. मॅच रद्द करपाचें चडशें कारण पावस हें आसलें तरी कांय मॅची पावसा बगर लेगीत रद्द करच्यो पडल्यात.
वन-डे क्रिकेटींत भारताच्यो मॅची रद्द जाल्ल्यात तातूंत चडश्यो श्रीलंके आडच्यो आसात. भारत श्रीलंके आड आतां मेरेन 165 मॅची खेळ्ळां तांतूतल्या 11 मॅचीचो निर्णय लागपाक शकलो ना. तातूंत 2022 वर्सांच्या चॅम्पियन्स कपाच्या दोन फायनलींचो आसपाव आसा. फायनलीच्या पयल्या दिसा श्रीलंकेच्या डावा वेळार पावसाक सुरवात जाली. उपरांत खेळ जावपाक शकलो ना आनी मॅच रिझर्व दिसाक खेळोवची पडली. त्या दिसा लेगीत श्रीलंकेन डाव सुरू करतगीर खेळ जावपाक शकलो ना आनी मॅच रद्द करची पडली.
पाकिस्ताना आड 1986 वर्सा खेळल्ली वन-डे मॅच प्रेक्षकांनी केल्ले हुल्लडबाजीक लागून ती रद्द करची पडिल्ली. तेन्ना पाकिस्तानी प्रेक्षकांनी आपले तीन खेळगडे बेगीन आवट जाल्ल्यान फातोर शेवटून मारपाक सुरवात केल्ली. भारत आनी श्रीलंकें मदीं 2009 वर्सा दिल्लींत जाल्ली वन-डे इबाडल्ले पिचीक लागून रद्द करची पडल्ली. त्या वेळार 23.3 ओव्हरींचो खेळ जाल्लो. पिचीचेर बॉल कश्या कशें उसळपाक लागल्ल्यान बॅट्समनांक दुखापत जावपाची शक्यताय आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
