भांगरभूंय | प्रतिनिधी
फिडेक 100 वर्सां पुर्ण जाल्ले खातीर आयोजीत केल्ले कासाब्लांका बुद्दीबळ सर्त नॉर्वेचो पांच खेपेचो संवसारीक वस्ताद ग्रॅण्डमास्टर मॅग्नस कार्लसनान जिखली.
कार्लसनान दुसऱ्या आनी निमाण्या दिसा खेळिल्ल्यो तिनांतल्यो दोन मॅची बादाबाद दवरल्यो, जाल्यार एक मॅच जिखली. ताणें 4.5 गुणां सयत पयली सुवात मेळयली. निमाण्या दिसा चवथे फेरयेंतली पयली मॅच भारताच्या विश्वनाथन आनंदा आड जाली. पयले फेरयेंत हारोवपी कार्लसनाक हे खेपे बरोबरीचेर समाधान मानचें पडलें. पांचवे फेरयेंत मात कार्लसनान इजिप्ताच्या अमीन बासेमाक हारयलो आनी निमाणे फेरयेंत अमेरिकेच्या हिकारू नाकामुराक बरोबरींत आडायलो.
नाकामुरान आनंदा आडची मॅच बादाबाद दवरली, जाल्यार अमिनाक हारोवन 3.5 गुणां सयत दुसरी सुवात मेळयली.
दुसरे वटेन पयल्या दिसा फकत एक गूण करपी आनंदान दुसऱ्या दिसा कार्लसन आनी नाकामुराक बरोबरींत आडायलो, जाल्यार अमिनाक हारोवन तीन गुणां सयत तिसरी सुवात मेळयली. दुसऱ्या दिसा सगल्यो मॅची हारून अमिन निमाणे सुवातेर उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
