मॅग्नल कार्लसन चॅम्पीयन

भांगरभूंय | प्रतिनिधी

संवसारीक क्रमवारींत पयले सुवातेर आशिल्ल्या नॉर्वेच्या मॅग्नल कार्लसनान सुपरबेट रॅपीड आनी ब्लिटझ् बुद्दीबळ सर्तीचें वस्तादपण जोडलें. ताणें वट्ट 26 गुणां सयत पयली सुवात मेळयली. वेई यी हाका दुसरी सुवात फावो जाली. ताचे 25.5 गूण जाले. जॅन डुडाक तिसरे सुवातेर समाधान मानचें पडलें.

कार्लसन आनी वेई यी हांचे मदीं निमाण्या दिसा अडीच गुणांचो फरक आशिल्लो. हो फरक भरून काडून वस्तादपण जोडप कठीण आशिल्लें. पूण, दिग्गज खेळगडो कार्लसनान वट्ट 26 गुणांची कमाय करीत वस्तादपण जोडलें. ताणें वेई यी आड फकत अर्द्या गुणाच्या फरकान वस्तादपण जोडलें. कार्लसनान सेगीत णव खेळगड्यांक हारयले.

भारताच्या तीन ग्रॅण्डमास्टरांनी सर्तींत वांटो घेतिल्लो. आर प्रज्ञानंदाक 19 गुणां सयत चवथे सुवातेर समाधान मानचें पडलें. अर्जुन इरिगेसी 18 गुणां सयत पांचवे सुवातेर उरलो, जाल्यार संवसारीक बुद्दीबळ वस्तादपण सर्तीचो आव्हानवीर डी गुकेशाक 12.5 गुणां सयत पांचवे सुवातेर समाधान मानचें पडलें.

सर्तींतली निमाणी गुणक्रमवारीः 1) मॅग्नल कार्लसन (26 गूण), 2) वेई यी (25.5 गूण), 3) जॅन डुडा (19.5 गूण), 4) आर प्रज्ञानंद (19 गूण), 5) अर्जुन इरिगेसी (18 गूण), 6) नोदीरबेक अब्दुसत्तोरोव (17.5 गूण), 7) किरील शेवचेंको (15 गूण), 8) अनीश गिरी (14 गूण), 9) विन्सेंट केमर (13 गूण) आनी 10) डी गुकेश (12.5 गूण).