भांगरभूंय | प्रतिनिधी
पिलीभीत, खबरां संस्था ः उत्तर प्रदेशांतल्या पिलीभीत शारांत एक धक्को दिवपी घडणूक घडल्या. मॅगी खावन 10 वर्सां पिरायेच्या भुरग्याक मरण आयले जाल्यार कुटुंबांतल्या हेर पांच वांगड्यांक विखबादा जाल्या, असो दावो शेजाऱ्यांनी केला. तांका उपचारा खातीर हॉस्पिटलांत दाखल केल्यात. ह्या कुटुंबांतल्या वांगड्यांनी शीता वांगडा मॅगी खाल्ली.
ही घडणूक पिलीभीतच्या पुरनपूर वाठारांत घडली. ह्या वाठारांत रावपी मणिराज हांची धूव सीमा म्हयनो आदीं आपले पूत रोहन आनी विवेका वांगडा आवय- बापायच्या घरा रावपाक आयिल्ली. 9 मेचे रातीं मणिराजाच्या घरा मॅगी आनी शीत केल्लें. सीमा आनी तिची भुरगीं तशेंच कुटुंबांतले हेर जाणांनी तें खालें. ते उपरांत कुटुंबांतल्या 6 वांगड्यांची भलायकी इबाडली. दुसऱ्या दिसा सकाळीं सगळ्यांक उपचारा खातीर हॉस्पिटलांत दाखल केले. परिस्थिती सुदारल्या उपरांत सगळे घरा परतले. पूण 10 मेचे रातीं परतून सगळ्यांची भलायकी इबाडली. तांका ओकारे वांगडाच मोडशी जावपाक लागली. आनी 11 मे दिसा सकाळीं तांतूतल्या 10 वर्सा पिरायेच्या रोहानाक मरण आयलें. उरिल्ल्या 5 जाणांची भलायकी बरी आसा अशें दोतोरांनी सांगलें. हे घडणुके संबंदी कुटुंबान कागाळ केल्ली ना अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
