भांगरभूंय | प्रतिनिधी
एका गांवांत बिजू नांवाचो गिरेस्त मनीस रावतालो. ताचेकडेन एक घोडो आशिल्लो. ताचें नांव मोहक. धनी ताका आपल्याक जाय थंय व्हरतालो. घोड्याक चडशी दर्यावेळ आवडटाली. आपल्याच तंद्रींत तो उमेदीन नाचतालो. दर्या वयले शॅक मालक बी ताचे वळखीचे जाल्ले. केन्नाय सामान व्हर हाड करपाचें काम तो बेस बरें करतालो. ताका ते ताच्या आवडीचें खाण दिताले. एकेक फावटी भिजयिल्ले चणे ताच्या घोस्ताचें खाण ताका दिताले. आपलो धनी रागार जावं मोगार, ताका जुस्त कळटालें. तो सामको शिटूक आशिल्लो. धनयान सांगचें पयलींच आपल्या मनाची तयारी करून दवरतालो. तो सामको विस्वासू आशिल्लो. ताका एक फावटी सांगलें जाल्यार याद बरी उरताली. केन्नाय इश्टाक कितेंय व्हरून दी म्हळ्यार दिवपाचें काम बेस बरें करतालो.
एक दीस सदचेवरी तो सामान घेवन वतना वाटेर चोरांनी ताका आडायलो आनी ताचेकडल्यान सगळें सामान काडून घेतलें. घोडो तोंड वाकडें करून परतलो आनी सगळी गजाल धनयाक सांगली. इतले वर्सांची ताची संवकळ आशिल्ली. तरी लेगीत ताणें घोड्याचेर मात लेगीत विस्वास दवरनासतना ताका बरोच बडयलो. घोड्याक खूब वायट दिसलें. घोड्यान खावंक दिल्लें तें लेगीत खावंक ना. तो मागीर रातचो घर सोडून चलत रावलो. धनयान ताका सगळे कडेन सोदलो पूण ताचो पत्तो लागलो ना.
घोडो तिडकीन वाट मेळटा थंयच्यान वाट काडीत चलत रावलो आनी निमणें रानांत पावलो. रानाचो राजा शिंव ताका वाटेर मेळ्ळो. तो मात्सो जाण्टो जाल्लो. घोड्या कडेन ताणें इश्टागत केली आनी आपल्या वांगडा राव अशें सांगलें. घोड्याकूय आपल्याक उजू वाट मेळ्ळी म्हूण बरें दिसलें. तशें शिंवानूय ताका सांगलें “ हांव आसतना तुका भिवपाची गरज ना. हांव रानाचो राजा. हांव सांगता तशी हेर जनावरां वागतलीं. तूं सुशेगाद हांगाच राव.”
घोडो हुस्को सोडून रावंक लागलो. शिंवालें मंत्रीमंडळ आशिल्लें. तातूंत हुंदीर, सोसो ,रानदुकर आनी कोलो आशिल्लो. शिंव जाणटो जाल्ल्यान ताका खावपाक हाडून दिवपाचें काम हीं जनावरां करतालीं. तीं आपल्या कडल्यान जातां तितलें खाण शिवांक हाडून दितालीं. अशें करतां करतां शिंवाक सावज हाडून दिवपाक त्या जनावरांक जायना जालें. शिवांकूय चुरचुरून भूक लागताली. निमणें हुंदरान म्हळें, म्हाका खा. शिंवान म्हळें तूं म्हज्या मंत्रिमंडळातलो तुका कसो खातलो हांव ? सोश्यानूय शिवाक आपल्याक खा म्हणून सांगलें ताकाय तशेंच सांगलें. मागीर कोल्याची फावट आयली. ताकाय शिवान न्हंयकार दिलो.
निमणें घोड्याक दिसलें आपणेंय अशेंच म्हणत जाल्यार शींव आपल्याक इश्टागतीच्या नांवार असोच सोडटलो. आनी तो घोडो ताका म्हणपाक वता थंय आसा शिंवान ताचेर झडप घाली. आनी ताका सोमतोच आडवो घालो. हेर मंत्रिमंडळांतल्या जनावरांनी थंयध्यान फ़ुज्ज्यो काडल्यो. शिंव कितलोय जाणटो जालो म्हूण कितें जालें तो आपलो सभाव सोडटा ????
कोणेंय कोणाचेर सामको विस्वास दवरचो न्हय.
अलका सिनाय असोळडेकार
9822981107
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
