भांगरभूंय | प्रतिनिधी
वेनचांग, खबरां संस्था ः चंद्राच्या पयसुल्ल्या (काळ्या) वटेनच्यान नमुने एकठांय करून वैज्ञानिक अभ्यासा खातीर धर्तरेचेर परत हाडपी चीनाचें 53 दिसांचें चंद्र संशोधन मिशन ‘चांग-ई-6’ मीशन फाटल्या म्हन्यांत सुरु जाल्लें. आतां ह्या मून लॅण्डराक चंद्राच्या काळखी वाठारांतल्यान माती काडपाक येस मेळ्ळें. चीनाच्या अंतराळ मिशनान ही म्हायती दिल्या. चीनाच्या मून लॅण्डरान चंद्राच्या काळखी वाठारांतल्यान 2 कील माती हाडल्या. अशें करपी चीन हो संवसारांतलो पयलो देश थारलो.
ह्या नमुन्याचें विश्लेशण करुन अंतरिक्ष शास्त्रज्ञांक चंद्र, धर्तरी आनी सौर मंडळ हांची निर्मिती आनी उत्क्रांती हांचे विशीं म्हायती मेळूं येता, अशें चीनाची अंतरिक्ष एजन्सी नॅशनल स्पेस अॅडमिनिस्ट्रेशनान सांगलां. चीनाच्या येवपी चंद्र मिशनांतय हो डेटा वापरतले.
ह्या मिशनाच्या वेळार यानाक चंद्राच्या काळ्या वटेन चड तापमानाचो सामनो करचो पडलो. तातूंत चंद्राचे नमुने घेवपाच्यो दोन पद्दती वापरल्यो, तातूंत पृश्ठभागाचे नमुने एकठांय करपा खातीर ड्रिल वापरप आनी पृश्ठभागाचे नमुने धरपा खातीर रोबॉट हाताचो उपेग करप ह्यो दोन पद्दतीं वापरल्यो अशें नासान सांगलें. ह्या पद्दतींनी आपोआप वेगवेगळ्या सुवातींनी वेगवेगळे नमुने एकठांय केल्ले. लॅण्डराचेर लायिल्ले जायते पेलोड्स, लँडींग कॅमेरो, पॅनोरॅमिक कॅमेरो, चंद्रा वयली माती आनी फातर उखलपाक बरी कामगिरी केली आनी नियोजीत केल्ले प्रमाण शास्त्रीय संशोधन केलें अशें सीएनएसएन एका अहवालांत म्हणलां. तशेंच नमुने घेतले उपरांत लॅण्डरान पयलेच खेपे चंद्राचे दुसरे वटेन चीनी राश्ट्रध्वज उबारलो. थंय चीन संशोधन केंद्र उबारूंक सोदता. तशेंच चंद्राचेर 2030 मेरेन मनीस धाडपाचीय येवजण आसा. ताच्या अभ्यासा खातीर ही माती हाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
