भांगरभूंय | प्रतिनिधी
तुमी हिंदू आसात, भारतमातेचे पूत आसत ही भावना जाय
हांव अमक्या जातीचो, धर्माचो ही भावना येवंक फावना
मोहन भागवत हांचें बंगळुरूंत उलोवप
बंगळुरू: ब्राह्मण, मुस्लीम, ख्रिश्चन हांकां संघांत स्थान ना. हांगा येवपी मनीस हो फक्त हिंदू आसचो. आतां तुमकां दिसतलें की हांवें अशें कित्याक म्हणलें? म्हजें म्हणणें अशें, विवीध जाती संप्रदायाचे, धर्माचे, पंथाचे मागीर ते ब्राह्मण आसूं, मुस्लीम आसूं वा ख्रिश्चन कोणूय संघांत येवंक शकतात. पूण तुमी संघांत येतकच तुमी हिंदू आसात, भारतमातेचे पूत आसात ही भावना जाय. हांव आमक्या जातीचो, समाजाचो, धर्माचो आसा ही भावना तुमच्या मनांत येवंक फावना. ती भावना भायर दवरून संघांत वांटेकार जावपाचें आसत जाल्यार खोशयेन येयात, अशें सरसंघचालक मोहन भागवत हांणी म्हणलें.
तें बंगळुरूंत एका परिशदेंत उलयताले. हे परिशदेंत संघाचो 100 वर्सांचो नियाळ घेतलो. संघाची 100 वर्सांची वाटचाल सोंपी नाशिल्ली अशेंय तांणी म्हणलें.
मुस्लीम, ख्रिश्चन धर्माचे लोक संघांत आसात हाचें म्हत्वाचें कारण म्हणल्यार हिंदू समाजांत हेर जातीचो आनी धर्माचोय आस्पाव जाता. आमी संघात कितले मुस्लीम, आनी कितले ख्रिश्चन आसात हें मेजूंक बसनात. कारण आमचे खातीर सगलेच भारतमातेचे पूत आसात अशें भागवत हांणी म्हणलें.
आमी मुस्लीमा खातीर वेगळ्यो शाळा, ख्रिश्चना खातीर वेगळ्यो संस्था, ब्राह्मणां खातीर वेगळ्यो शाळा अशें केन्नाच करिनात. आमचे खातीर सगल्यांचे बाबतींत भावना समान आसा. तुमी विशिश्ट जाती, धर्माचे आसत जाल्यार ताचो आमी सन्मान करूं. पूण तुमी संघात आयले, शाखेत आयले की तुमी भारतमातेचे पूत आसात. संघाची कार्यपद्दत अशेच तरेची आसा अशें मोहन भागवत हांणी म्हणलें.
राष्ट्रीय स्वयंसेवक संघा विशीं भुमिका मांडटना मोहन भागवत हांणी म्हणलें, राष्ट्रीय स्वयंसेवक संघा खातीरचें मार्गक्रमण हें सोंपें नाशिल्लें. संघाक 100 वर्सां पुराय जाल्यात. तातूंतलीं 60 ते 70 वर्सां ही संघर्शाची आनी खर विरोध सहन करपाक लावपी आशिल्ली. संघाचेर दोन फावटी बंदी घाली आनी राष्ट्रीय स्वयंसेवक संघाच्या स्वयंसेवकांचेर हल्ले जाले, टिका जाली, स्वयंसेवकांची हत्या जाली. आपलो विस्तार जावचो न्हय हे खातीर कितलेशेच यत्न जाले पूण स्वयंसेवकांनी ते जावंक दिले नात. निस्पृह भावनेन स्वयंसेवक आनी संघ काम करीत रावलो. ताका लागूनच आमी लोकांच्या मनांत विस्वास निर्माण करूंक शकले अशेंय मोहन भागवत हांणी म्हणलें.
हिंदू समाजाचेर राष्ट्रीय स्वयंसेवक संघान लक्ष केंद्रीत केलें की आमकां प्रस्न विचारतात तुमी हें कित्याक करतात? दरेक हिंदू हो भारता खातीर जबाबदार व्यक्ती आसा. आमकां राष्ट्रीयता ही इंग्रजांनी दिली ना. आमी प्राचीन काळा सावन हिंदू आसात. संवसारांतल्या खांची कोनशांतल्या लोकांक हें वास्तव खबर आसा दरेक राष्ट्राची एक मूळ संस्कृती आसता. भारताची मूळ संस्कृती कितें? हो प्रस्न तुमी विचारीत जाल्यार ताचें वर्णन आसा तें आमकां हिंदू ह्या शब्दा कडेन घेवन वता अशेंय मोहन भागवत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
