भांगरभूंय | प्रतिनिधी
गुवाहाटी, खबरां संस्था: आसाम विधानसभेन मुसलमानांचें लग्न आनी घटस्फोटाची नोंदणी सक्तीची करपी विधेयक संमत केलें. येणावळ आनी आपत्ती वेवस्थापन मंत्री जोगेन मोहन हांणी हे विधेयक मांडलें. ते विशींच्या दुबावाक मुख्यमंत्री हेमंत बिस्व सरमा हांणी जाप दिली.
ह्यान पयलीं काझी वरवीं जाल्लीं लग्नां वैध आसात. पूण आतां जावपी नवें लग्न ह्या कायद्याच्या खाला आसतलें अशें मुख्यमंत्र्यान स्पश्ट केलें. आदीं काझी लग्नांची नोंदणी करताले, पूण नव्या कायद्यांत ही नोंदणी सरकार करतलें.
विधेयकांतल्यो तरतुदी
बालविवाह आडावप आनी न्हंवर्या-व्हंकलेच्या संमती बगर लग्न जावचें न्हय हो ह्या विधेयका फाटलो हेतू. चड बायलो करपाक आडावप आनी लग्न जाल्ल्या बायलांक तांचो हक्क मेळचो आनी घोवाच्या मरणा उपरांत मालमत्तेचो वांटो मेळचो अशी तरतूद ह्या विधेयकांत आसा अशें जोगेन मोहन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
