भांगरभूंय | प्रतिनिधी
मुळाव्या पांवड्या वेल्यो मराठी माध्यमांतल्यो शाळा बंद पडटात ताचें खापर सुभाष वेलींगकार हांणी शासनाचेर आनी गोंयच्या मुख्यमंत्र्यांनी पालकांचेर फोडलां. आपल्या भुरग्यांच्या बऱ्या-वायटाचो निर्णय पालकांनी घेवप हें सभावीक आसता. भुरग्याच्या फुडाराचे नदरेन म्हत्वाच्या आशिल्ल्या शिक्षणा सारख्या विशया संबंदी ताची शाळा, शिक्षणीक माध्यम हे पालकां खातीर भोव म्हत्वाचे निर्णय आसतात. कांय पालक अशे निर्णय अणभवान आनी बुद्द वापरून घेतात जाल्यार कांय जाण पूर्वग्रहान, अजाणतेपणान वा कोणाच्या आनी कसल्या तरी प्रभावान घेतात.
आतां शासकी शाळा बंद पडपा फाटल्या कारणांचो सोद घेवपाचो यत्न करुया. ते खातीर 2024-25 ह्या शिक्षणीक वर्साचे कांय आंकडे पळोवया. ह्या शिक्षणीक वर्सांत मराठी माध्यमांतल्या शासकी शाळांची संख्या 626 जाल्यार खाजगी शाळांची संख्या 109 आशिल्ली. कोंकणी माध्यमांतल्यान चलपी शासकी शाळांची संख्या 15 जाल्यार खाजगी शाळांची संख्या 51 आशिल्ली. इंग्लीश माध्यमांतल्या मुळाव्या पांवड्यार चलतल्या खाजगी शाळांची संख्या आशिल्ली 251. आतां मजा पळयात, कोंकणी ही गोंयची राजभास. राष्ट्रीय शिक्षण धोरणांत सांगिल्लें प्रमाण आवयभास, घरांत उलयतात ती भास वा सरभोंवतणची भास हे सगले निकश माध्यम भास म्हूण तिका लागू जातात. पूण शासनाक ह्या तत्वांचें कांयच पडून गेल्लें ना. पुराय गोंयांत कोंकणी भाशेंत चलतल्या मुळाव्या शाळांचो आंकडो फकत 15 आनी खाजगी शाळांचो 51.
2024-25 वर्सा वट्ट 687 कोंकणी- मराठी माध्यमांतल्या शासकी शाळांनी शिकतल्या विद्यार्थ्यांची पटसंख्या 18,465 इतली आशिल्ली जाल्यार त्या शाळांनी शिकयतल्या शिक्षकांची संख्या 1478 आशिल्ली. ह्या शाळांनी शिक्षक-विद्यार्थी प्रमाण 1:12 इतलें आशिल्लें. कोंकणी- मराठी- इंग्लीश माध्यमांतल्या 289 अनुदानीत खाजगी शाळांनी शिकतल्या भुरग्यांची संख्या 51894 जाल्यार शिक्षकांची संख्या 1483 आशिल्ली. प्रमाण आशिल्लें 1:34. विनाअनुदानीत 132 मुळाव्या शाळांनी जातूंत भोवतेक इंग्लीश माध्यमाच्यो शाळा आसात त्या शाळांनी शिकपी भुरग्यांची संख्या आशिल्ली 21056 जाल्यार शिक्षकांची संख्या 1086. प्रमाण आशिल्लें 1:19. हाचो अर्थ असो की एके वटेन शासन कोंकणी- मराठी शिक्षणाचो भार अनुदानीत शाळांचेर घालता आनी दुसरे वटेन बाल शिक्षण हक्क कायदो वा राष्ट्रीय शिक्षण धोरणांत सांगिल्लीं तत्वां पाळिना. पूण अजापाची गजाल म्हणल्यार शिक्षक- विद्यार्थी प्रमाण उणें आसून लेगीत शासकी मुळाव्या शाळां कडेन पालक आकर्शीत जायना.
मराठी माध्यमाच्या 626 शासकी शाळांनी शिकपी भुरग्यांची सरासरी दर शाळे फाटल्यान 1:26 इतली आसा जाल्यार 109 अनुदानीत शाळांनी तेंच प्रमाण 1:126 आसा. कोंकणीचे बाबतींत हेंच प्रमाण 15 शासकी शाळांनी 1:50 जाल्यार खाजगी 51 शाळांनी 1:145. आयचो पालक मुळाव्या पांवड्यार सोय आसत जाल्यार कोंकणी माध्यमा कडेन मराठी माध्यमा परस चड आकर्शीत जाता असो ताचो अर्थ जाता. फाटल्या धा वर्सांतली वाडटी पटसंख्या आनी शाळा-विद्यार्थी प्रमाण ताची गवाय दिता.
आतां बंद पडपी शासकी मुळाव्या शाळांच्या हेर कारणां कडेन येवया. शासकी शाळांनी पालक कित्याक आकर्शीत जायना ह्या प्रस्नाची जाप शासनान प्रामाणीकपणान सोदपाचो केन्नाच यत्न केल्लो दिसना. फाटल्या धा वर्सांत कोंकणी माध्यमांत शिकपी विद्यार्थ्यांची लागीं लागीं तीन पटींनी वाडिल्ली पटसंख्या पळयल्यार असो निश्कर्श काडूं येता की लागसाराक शाळा उपलब्ध आसत जाल्यार पालक आपल्या भुरग्यांक कोंकणी माध्यमाच्या शाळांत धाडपाक तयार आसात. पूण दुर्दैवान कोंकणी राजभास आशिल्ल्या आमच्या गोंयांत पेडणें, बार्देस, दिवचल, सत्तरी, फोंडें, सांगें, केपें आनी काणकोण अश्या आठ म्हालांत कोंकणी माध्यमांतली एकय शासकी प्राथमीक शाळा अस्तित्वांत ना. पेडणें, सांगें आनी धारबांदोडें ह्या म्हालांत तर कोंकणी माध्यमांतली एकय शाळा ना. आवयभाशेंतल्यान आपल्या भुरग्याक शिकोवंक सोदतल्या ह्या वाठारांतल्या पालकांनी आपल्या भुरग्यांक खंय धाडपाचें? आपल्याक इंग्लीशीचो सोस आसा म्हूण न्हय तर कोंकणीचो पर्याय ना म्हूण इंग्लीश माध्यमाच्या शाळांनी आपल्या भुरग्याक धाडचो पडटा अशें सांगपी साबार पालक आमकां गोंयच्या विंगड विंगड वाठारांनी मेळटले. पालकांच्या मानेर इंग्लीशीचें भूत बशिल्लें आसा आनी भुरगीं इंग्लीशीन शिकलीं जाल्यारच तीं व्हड जांवक पावतलीं अशें कांय पालकांक दिसता हेंय महत्वाचें कारण आसाच. तांकां आपलीं भुरगीं फिरंगी उलयतात तशी फाड-फाड इंग्लीश उलयिल्लीं जाय आसतात. मागीर शिक्षणीक धोरणां आनी सिद्धांत घाल चुलींत!
खाजगी शाळांक दर्जाच्या बाबतींत फाटी उडोवपी अश्यो कांय शासकी शाळा आमकां पळोवंक मेळटल्यो. त्या शाळांतल्या शिक्षकांनी चौकटी भायर वचून आपल्या लागणुकेक पाळो दिवन शिकोवपी शिक्षक आसात. म्हूण त्यो शाळा शासकी आसून लेगीत लोकप्रीय जाल्यात. शिक्षकांच्यो नेमान जावपी बदल्यो, तांचेर पडटलें वेंचणुको, सर्वेक्षणां सारखें आलायतें काम आदीं गजालींक लागून पालक खाजगी शाळांचो पर्याय निवडटा.
शासन मुळाव्या शाळांची स्थिती सुदारपाचे नदरेन कितलें असंवेदनशील आसा तें पळयतलो जाल्यार अर्थसंकल्पांत केल्ली शिक्षणा खातीरची खर्चाची तरतूद. मुळाव्या पांवड्यार गरजेचीं धोरणां, येवजण्यो, प्रशिक्षणां, शिक्षणीक साहित्य निर्मिती आदीं गजाली शासनाक म्हत्वाच्यो दिसनात हें दुर्दैव.
शासकी आनी खाजगी शाळांनी एकच अभ्यासक्रम आनी एकेच तरेची परिक्षा. तरी पालकांक खाजगी शाळा आकर्शीत करतात. पालकांक जाय तो शिक्षणाचो दर्जो. जाय ती आनंददायी शिक्षणा खातीर गरजेची साधनसामुग्री आनी शिक्षणीक साहित्याची तजवीज.
‘वेताक चुकल्यार वांवाक आनी वांवाक चुकल्यार गांवाक चुकता’ अशी एक म्हणणी आसा. गोंयच्या मुक्ती उपरांत आमी मुळाव्या शिक्षणांत कोंकणी माध्यम न्हयकारून चूक केली. इतलीं वर्सां जालीं, ती चूक एके पिळगे कडच्यान तिच्या खांद्यार बसून दुसरे पिळगे कडेन वचत आसा. शिक्षणीक मळार हीं घाळपणां सशक्त पिळगी घडोवपाचे नदरेन खंयच्याय समाजाक परवडत काय?
अनंत अग्नी
9422439903
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
