मुळाव्या शिक्षणाचें माध्यम इंग्लीश करचें

भांगरभूंय | प्रतिनिधी

मायकल लोबो : कोंकणी, मराठी सक्तीची करपाची मागणी

भांगरभूंय | प्रतिनिधी

म्हापशें : भाऊसायब बांदोडकार हांणी सुरू केल्ल्यो शाळो तिगोवपाच्यो आसल्यार मुळाव्या शिक्षणाचें माध्यम इंग्लीश करप गरजेचें. तशेंच शाळांनी कोंकणी आनी मराठी सक्तीची करपूय गरजेचें. मुळाव्यो शाळो वाटावपाचें आसल्यार हातूंत कोणेंच राजकारण करचें न्हय, अशें मत आमदार मायकल लोबो हांणी उक्तायलें. बांदोडकार हांचे जयंती निमतान अभिवादन कार्यावळी वेळार ते उलयताले.

आयज बर्‍यो इंग्लीश मीडियम शाळा आसात. हाका लागून पालकूय भुरग्यांक ह्याच शाळांनी शिक्षण दिवपाक सोदतात. मात हाका लागून मुळाव्यो शाळो बंद जावपाचे स्थितींत आशिल्ल्यान सरकारान ह्यो शाळा एनजीओंक दिवपाचें थारायलां. सरकारा कडेन 33 आमदार आसात, हाका लागून मुळावो शाळो वाचोवपा खातीर सरकारान योग्य निर्णय घेवचो, आमचें सगळ्यांचो ह्या निर्णयांक पुरायेन तेंको आसा, अशें लोबो हांणी म्हणलें. ह्या मुळाव्या शाळांच्या शिक्षकांचो पगार, शाळेंतल्यो सुविधा, दुरुस्तीकाम ह्या कारणां खातीर सरकार दर वर्सा लाखांनी रुपया खर्च करता. मात इतलें करुनूय ह्यो शाळा 1-2 वर्सांनी बंद जातात, हो प्रकार दुखेस्त जावन आसा. भाशावाद ही वेगळी गजाल. तो शिक्षणाच्या आड येता. मात मुळावी शाळा वाटावपाच्यो आसल्यार मुळाव्या शिक्षणाचें माध्यम इंग्लीश करप गरजेचें, अशें आमदार लोबो हांणी म्हणलें.

लोबोंच्या संकेताची घेतल्या नोंद : वेलिंगकार

देशभरांत नव्या राष्ट्रीय शिक्षण धोरणाची अंमलबजावणी नेटान चल्ल्या. संवसारीक शिक्षणीक सिद्धांता प्रमाण मुळावें शिक्षण हें आवयभाशेंतल्यानूच दिवपाक जाय हाचेर भर आसा. आमचें राष्ट्रीय धोरण ह्याच तत्वाचेर आदारीत आसा. दुर्देवान गोंयांत मात ‘राजकारण आनी धर्मकारण’ प्रभावी थारून कोंकणी आनी मराठींक घातक थारपी, मुळाव्या पांवड्याचेर चर्चीच्या इंग्लीश मुळाव्या शाळांक अनुदान दिवपी धोरण सरकारान आतां मेरेन आपणायलां. नव्या शिक्षणीक धोरणाची कार्यवाही करतना ही चूक गोंय सरकार सुदरतले अशी आस्त लोकांनी बाळगिल्या. आवयभास मोगी लोकांनी आनी भारतीय भाषा सुरक्षा मंचान आमदार मायकल लोबो हांणी दिल्ल्या परधार्जिण्या आनी शिक्षणीक सिद्धांत विरोधी संकेताची नोंद घेतल्या, अशें प्राचार्य सुभाष वेलिंगकार हांणी म्हणलां.