भांगरभूंय | प्रतिनिधी
कोंकणी आनी मराठी सक्तीची करची, अशीय मागणी
म्हापशें : भाऊसायब बांदोडकार हांणी सुरू केल्ल्यो शाळो तिगोवच्यो आसल्यार मुळाव्या शिक्षणाचें माध्यम इंग्लीश करप गरजेचें. तशेंच शाळांनी कोंकणी आनी मराठी सक्तीची करपूय गरजेचें. मुळाव्यो शाळो वाटावपाचें आसल्यार हातूंत कोणेंच राजकारण करचें न्हय, अशें मत आमदार मायकल लोबो हांणी उक्तायलें. बांदोडकार हांचे जयंती निमतान अभिवादन कार्यावळी वेळार ते उलयताले.
आयज बर्यो इंग्लीश मीडियम शाळो आसात. हाका लागून पालकूय भुरग्यांक ह्याच शाळांनी शिक्षण दिवपाक सोदतात. मात हाका लागून मुळाव्यो शाळो बंद जावपाचे स्थितींत आशिल्ल्यान सरकारान ह्यो शाळो एनजीओंक दिवपाचें थारायलां. सरकारा कडेन ३३ आमदार आसात, हाका लागून मुळावो शाळो वाचोवपा खातीर सरकारान योग्य निर्णय घेवचो, आमचें सगळ्यांचे ह्या निर्णयांक पुरायेन फाटबळ आसा, अशें लोबो हांणी म्हणलें.
मुळाव्यो शाळो बंद जावप हें दुर्दैव
ह्या मुळाव्या शाळांच्या शिक्षकांचो पगार, शाळेंतल्यो सुविधा, दुरुस्ती काम ह्या कारणां खातीर सरकार दर वर्सा लाखांनी खर्च करता. मात इतलें करूनय ह्यो शाळा १- २ वर्सांनी बंद जातात, हो प्रकार दुखेस्त जावन आसा. भाशा वाद ही वेगळी गजाल. तो शिक्षणाच्या आड येता. मात मुळावी शाळा वाटावपाच्यो आसल्यार मुळाव्या शिक्षणाचें माध्यम इंग्लीश करप गरजेचें अशें आमदार लोबो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
