भांगरभूंय | प्रतिनिधी
पायलट जावपा खातीर कितें करपाक जाय, ते विशींचो लेख आमी फाटल्या सोमारा वाचलो. तांणी आनी हेर सगळ्यांनी फर्स्ट एड म्हणल्यार मुळावो उपचार शिकून घेवपाक जाय. कित्याक तर ते चड वेळ मळबांत आसतात. विमानात दोतोर आसतात, पूण खबरदारी म्हूण मुळाव्या उपचारांची ताका खबर आसप बरें. दोतोर विजय बर्डे आनी तांची दोतोर घरकान्न भार्गवी हीं मार्गदर्शन दिवपाक सरकारी पांवड्यार सगल्यात वतात. गोंयांत पसून तीं येतात. विमान चलोवपाक बसचे पयलीं पायलटान भलायकेचे नदरेन आपूण कसो आसा, ततें पळोवपाक जाय. ताची नदर वेवस्थित आसपाक जाय. पयलीं आपली भलायकी मागीर ताणें दुसऱ्यां कडेन लक्ष दिवपाक जाय. उड्डाण करपाक आपूण सारको आसा काय ना, तें ताका खबर आसपाक जाय. विमानाची, हवामानाचीय म्हायती ताका आसप गरजेचें. हवामान यंत्रणा आसतातूच, तरीय आपणें अदमास लावंक शिकपाक जाय. आपलो अदमास कितलो खरो, फट थारता, ताचोय अभ्यास ताका आसप गरजेचें.
मुळावे उपचार कित्याक खबर आसपाक जाय, तें पयलीं जाणून घेयात. एकेकदा तुमकां दोतोराची वाट पळोवची पडटा. कांय कारणाक लागून तो पावलो ना, जाल्यार अपघातांत तो मनीस भायर पडूंक शकता. देखून मुळावो उपचार कळप सगल्यां खातीर म्हत्वाचें. डाॅ. बर्डे सांगतात, तें राष्ट्रीय कर्तव्य आसूंक जाय. प्रत्येक मनशाक मुळावो उपचार हो खबर आसपाकूच जाय. रस्तो अपघात केन्नाय जावं शकतात. जर तुमकां मुळावे उपचार खबर आसत जाल्यार तें फायद्याचें थारूं शकता. विमानांतल्या पायलटाक तर हें शिकप सामकें गरजेचें. आकाशांत डीजीसीए जापसालदार आसतात. नागरी विमान येरादारी महासंचालकान पायलटां खातीर कांय नेम आंखल्यात. ते खूब कडक आसात. सगल्यांत पयलीं शारिरीक आनी मानसीक तंदुरुस्ती जाय. नदर बरी जाय. पायलटाचें वजन हिस्पाभायर आसपाक जायना. ह्यो तातूंतल्यो कांय गजाली. आनीकूय बऱ्योच आसात. तुमकां चड म्हायती जाय जाल्यार तुमी डाॅ. विजय (98813 98048) वा डाॅ. भार्गवी (98818 01700) हांचे कडेन संपर्क करूं शकतात.
पायलटांक उंचायेर काम करचें पडटा. हाचे खातीर ताचो स्वास कसो आसा, हें पळोवपाक कांय मानकां आसात. काळजाचें दुयेंस तर आतां कोणाकूय जाता. गोडेंमूत दुयेंसूय सगल्यांक जांवक शकता. देखून पायलटांक वेळावेळार दोतोरा कडल्यान तपासून घेवचें पडटा. डाॅ. बर्डे हांचें म्हणणें की आपूण निर्व्यसनी आसप गरजेचें. खाता तें अन्न पसून घरा शिजयिल्लें आसल्यार चड बरें. भायल्या अन्नांत भेसळ आसूं शकता. ताका लागून तुमची भलायकी इबाडपाक शकता. सद्दां व्यायाम करप गरजेचें. हाका लागून तुमचे कुडीची तांक बरी उरता. व्यायामा खातीर जिमांतूच वचपाक जाय अशें कांय ना. घरचे घरा तुमी दंड, बैठका, दोरये वयल्यो उडक्यो, व्यायाम, योग करपाक शकतात. भायर चलपाक वचूं शकतात. ते खातीर पयशे पसून खर्च करपाची गरज ना.
डाॅ. बर्डे सांगतात, सध्या पुराय देशांत जंय चड वाहनां आसात, थंय अपघात वाडिल्ले आसात. म्हणटकच दरेका ड्रायव्हराक मुळावे उपचार खबर आसपाकूच जाय. आमी सगल्यांकूच म्हायती दिवपाक शकना. ताका लागून आरटीओन एक खाशेलो विभाग सुरू करून गाडयां कडेन संबंदीत आशिल्ल्यांक मुळाव्या उपचारांची म्हायती दिवपाक जाय. तशें केल्यार कांय लोकांक रोजगारुय मेळटलो.
मुळाव्या उपचारांचें म्हत्व कितें? खूब आसा. अपघात जालो काय पयलें वर हें भांगराचें वर आसता. ह्या वेळार तुमी दोतोर पावचे पयलीं उपचार करपाक शकतात. दोतोर मागीर ते करतलोच, पूण मुळावे उपचार ताचे परस चड म्हत्वाचे आसतात. ताका लागून ते शिकपाक जाय. जायते जाण पुलिसांच्या भंयान अपघातांत सांपडिल्ल्याक हात पसून लावपाक वचनात. मात आतां तर कोर्टानूच सांगलां की अपघातांत सांपडिल्ल्या मनशाक पळोवप्याक पुलिशेंत फावटी मारपाची गरज पडची ना.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
