भांगरभूंय | प्रतिनिधी
डॉ. सावजी: सेवा समिती मडगांव आनी गोमंतक विद्या भारती वतीन राष्ट्रीय शिक्षणीक धोरणाचेर व्याख्यान
पणजी: मुळाव्या शिक्षणाचेर चड भर दिवपाची गरज आसा. राष्ट्रीय शिक्षणीक धोरणा प्रमाण मुळावें शिक्षण मांयभाशेंतल्यान जावप गरजेचें. हाका लागून भुरगीं बरे तरेन विचार करपाक शकतात. संवसारांतले सगळे शिक्षणतज्ञ हेंच सांगतात, अशें राष्ट्रीय फोकस गटाची वांगडी डॉक्टर मधुश्री सावजी हांणी सांगलें.
मडगांवां सेवा समितीचे आदर्श व्ही. व्ही. विद्यालय आनी गोमंतक विद्याभारती हांच्या जोड पालवान शिक्षणाच्या मुळाव्या पांवड्यार राष्ट्रीय शिक्षणीक धोरण 2020चे अंमलबजावणीचेर व्याख्यान आयोजीत केल्लें.
सेवा समितीच्या एन. डी. नायक हॉल पाजीफोंड मडगांवां जाल्ले हे कार्यावळींत मुखेल सोयरी म्हणून राष्ट्रीय फोकस गटाची वांगडी डॉक्टर सावजी उलयताली. तशेंच माचयेर गोमंतक विद्या भारतीचे जोड सचीव श्री प्रेमानंद नायक, सेवा समितीचे आदर्श व्ही. व्ही. विद्यालयाचे अध्यक्ष आश्विनीकुमार नायक आनी वेवस्थापकीय समितीची वांगडी रूक्मा सडेकार हाजीर आशिल्ले.
शिक्षणाच्या मुळाव्या पांवड्यार आनी ताचे फुडल्या टप्प्यांचेर भुरग्यांक हांसत खेळत शिक्षण दिवपाची येवजण ह्या शिक्षणीक धोरणांतल्यान राबयल्या. खंयचेय तरेचो ताण मागीर तो परिक्षेचो आसूं वा गृहपाठाचो अशे तरेन भुरग्यांचेर येवपाक जायना. हाची पुरायेन जतनाय ह्या शिक्षणीक धोरणांत घेतल्या, अशें डॉ. सावजी हांणी फुडें म्हणलें.
आमचें शरीर जें पांच गजालींतल्यान जालां. तांकां स्पर्श जावप गरजेचें हाची मुळावे शिक्षण वेवस्थेंत काळजी घेतल्या अशें तांणी सांगलें. हे पायांभूत वेवस्थेंत तीन ते फुडले पिरायेचेर लेखनाचो आग्रो धरिनासतना विवीध क्रियाकलाप आनी चित्रां वरवीं शिक्षण दिल्यार भुरग्यांक तें बरे तरेन समजता, अशें तांणी सांगलें.
मुखेल सोयर्यांक येवकार आनी प्रास्तावीक आश्विनीकुमार नायक हांणी केलें. सोयर्यांची वळख रूक्मा सडेकार हांणी केली. उपकार विद्यालयाची मुख्याध्यापिका श्वेतलाना बोर्जीस हांणी मानले. कार्यावळीचें सुत्रसंचालन सोनाली गांवकार हांणी केलें. ह्या सत्रा उपरांत पालकांनी विचारिल्ल्या प्रस्नांक डॉ. सावजी हांणी योग्य अशी जाप दिली. हे कार्यावळीक विवीध शाळेंतले शिक्षक, वेवस्थापन समितीचे वांगडी, निवृत्त शिक्षक, मुख्याध्यापक, पालक व्हडा संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
