भांगरभूंय | प्रतिनिधी
भांगरभूंय । प्रतिनिधी
दिवचलः मुळगांवच्या ज्ञानप्रकाश उच्च माध्यमीक विद्यालया वतीन संवसारीक खेळां दिसा निमतान मंगळार 29 ऑगस्टाक अस्नोडें खेळां प्रकल्पात ‘रेन रन रेस 2023’चें आयोजन केला. तातूंत सरकारी माध्यमीक विद्यालय – शिरोडवाडी मुळगांव, सरकारी माध्यमीक विद्यालय – मुळगाव ,सरकारी माध्यमीक विद्यालय – कासरपाल,सरकारी माध्यमीक विद्यालय -साळ, सरकारी माध्यमीक विद्यालय – हणखणे,सरकारी माध्यमीक विद्यालय – शिरगांव, सेंट क्लारा माध्यमीक विद्यालय -अस्नोडें, श्री सातेरी विद्यामंदिर – इब्रामपुर ,शिवाजीराजे माध्यमीक विद्यालय – खोलपेवाडी साळ,सेंट अँन माध्यमीक विद्यालय – थिवी ह्या शाळांतले सुमार तिनशें विद्यार्थी आनी शिक्षक वांटो घेतले.
हे खेळा कार्यावळी खाली 14 तें 17 वर्साच्या चले- चलयां खातीर 4×100 मीटर रिले सर्त, 14 वर्सां पिराये सकयल्ल्या भुरग्यां खातीर 1500 मीटर धांवपाची सर्त, 17 वर्सा पिराये सकयल्ल्या भुरग्यां खातीर 3000 मीटर धांवाची सर्त आसतली. हातूंत जें विद्यालय बरी कामगिरी करून दाखयतले तांका सांघीक वस्तादपण मेळटलें. वैयक्तीक पांवड्यार बरी कामगिरी करतल्यांक इनामां दितले.
ज्ञानप्रकाश विद्यालय दर वर्सा विद्यार्थ्यांचे सर्वांगी उदरगती खातीर तरेकवार उपक्रम चालीक लायता. ह्या रेन रेस खातीर जो खर्च येतलो तो लाटंबारशें पंचायतीचो सरपंच पद्माकर मळीक करतले. तांचे हस्तुकी रेन रेसीच्या जर्सीचें उक्तावण केले. कार्यावळींत नितीन कवठणकार, बाबू नायक आनी विश्राम कांबळी ह्या निवृत्त शिक्षकांचो भोवमान करतले. रेन रनांक झांट्ये वाणिज्य म्हाविद्यालयाचे शारीरिक शिक्षण अध्कारी सत्यवान हरमलकार मुखेल सोयरे म्हणून हाजीर रावतले. विद्यालय संस्थेची अध्यक्ष प्रिया पांडुरंग राऊत, वेवस्थापक अरविंद कुरी हाजीर रावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
