भांगरभूंय | प्रतिनिधी
स म्हयन्यां भितर काम पुराय करपाची लोकांची मागणी
भांगरभूंय । प्रतिनिधी
दिवचल : मुळगांवांतले पडून आशिल्ल्या खेळां मैदाना खातीर सुमार 65 लाख रुपया खर्च करून फक्त मैदानाचें सपाटीकरण आनी भोंवतणी वणत बांदल्या. दादल्यांक आनी बायलां खातीर शौचालय तशेंच जाळी मारिनासतना हें काम पुराय जालां, असो दाखलो दिल्ल्यान ग्रामसभेंत बोवाळ जालो. लोकांनी पंचायत मंडळाक धारेर धरलें. तशेंच हें काम स म्हयन्यां भितर पुराय करून दिवपाची मागणी केली. जर जायना जाल्यार सगल्या पंचांनी राजिनामो दिवचो, अशी मागणी लावन धरली. ह्या वेळार सरपंच मानसी कवठणकार आनी हेर चार पंचांनी काम जालें ना जाल्यार राजिनामो दिवपाची तयारी दाखयली.
फाटल्या आयतारा मुळगांव पंचायतींत घेतिल्ली ग्रामसभा खेळां मैदानाच्या बांदकाम विशया वयल्यान खूब गाजिल्ली. ते उपरांत ह्या विशयाचेर सविस्तर चर्चा करचे खातीर काल आयतारा खाशेलें सभेचें आयोजन केल्लें. हे बसकेक सरपंच, उपसरपंचा सयत सगले सातूनय पंच हाजीर आशिल्ले.
कृष्णनाथ परब, ओंकार परब, स्वप्नेश शेर्लेकार, वॉल्टर परेरा, संजय वझरकार हांचे सयत गांवचे लोक व्हड संख्येन बसकेक हाजीर आशिल्ले. दिल्ले मुजतींत काम पुराय केलें ना जाल्यार फुडले कारवायेक तयार रावात अशी शिटकावणी लोकांनी दिली.
कामांत कसलोच घोटाळो ना : सरपंच
मैदानाच्या बांदकामांत आमी कसलोच घोटाळो करूंक ना. तें काम गांवांतल्याच एका कंत्राटदाराक दिल्ल्यान आमी फक्त थाराव संमत करून कंत्राटदारा कडल्यान शौचालय, जाळी बसोवपाच्या कामाच्या बदला तितलेच रकमेंतल्यान राखणे वणत आनी व्हाळाचें काम करून घेवपाचें थारायलां. मात ते खातीर गट विकास कार्यालया कडल्यान मंजुरी घेवंक ना, ही चूक जाली. पूण लोकांच्या मागणे प्रमाण कंत्राटदारा कडेन उलोवणी करून स म्हयन्यां भितर हें पुराय करतले, ना जाल्यार राजिनामो दितले, अशें सरपंच मानसी कवठणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
