भांगरभूंय | प्रतिनिधी
दिवचल: गांवकरवाडो, मुळगांवां फाटल्या वर्सा एका बिबट्याक धरिल्लो. मात ताचे उपरांतूय ह्या वाठारांत बिबट्याचें सेगीत दर्शन जाता. हाका लागून थळाव्यां मदीं भंयाचें वातावरण निर्माण जालां. सध्याचे स्थितींत रातच्या वेळार ल्हान भुरगीं आनी बायलो भायर घरा भायर सरपाक भियेतना पळोवपाक मेळटा.
हालींच एका घराचे फाटले वटेन बिबट्याचें दर्शन जाले उपरांत रानविभागान ते सुवातेर पांजरो लायिल्लो. आतां मात बिबट्यां वांगडा रानदुकरांचोय वावर वाडिल्ल्याचें दिसता.
आयतारा सकाळीं सुनील राऊत हांच्या आंगणांत रानदुकर नाल्ल सोलतना दिसलो. शेनवारा सकाळींय दोन-तीन नाल्ल सोलिल्ले मेळ्ळे. आयतारा सकाळीं त्या घरांतले एके ज्येश्ठ बायलेक दारांतूच रानदुकर दिशिल्ल्यान काचाबूल जाली. ह्या रानदुकरान तिका पळयनाफुडें नाल्ल तशेच सांडून पळ काडली.
गांवच्या लोकांच्या म्हणण्या प्रमाण, दोंगरांचेर आदीं दाट रानां आसतालीं. मात सध्या खाण वेवसायाक लागून व्हड प्रमाणाचेर रानां काबार जाल्यांत. हाका लागून रानांतलीं जनावरां जेवण आनी रावपा खातीर घर सोदीत गांवांत येवपाक लागल्यांत. ह्या वाठारांत साळी, रानमांजर तशेंच केन्नाय मानग्यांचोय वावर दिसता. मात आतां बिबटे आनी रानधुकरां सारकिल्लीं धोको निर्माण करपी जनावरां सेगीत दिसूंक लागिल्ल्यान लोकां मदीं भंय पातळ्ळा.
रान विभागान आनी संबंदीत प्रशासनान हाचेर बेगोबेग उपाय करून अशे तरेच्या रानवटी जनावरांच्या वावराचेर नियंत्रण हाडचें, अशी मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
