मुळगांवचो बिबटो बरोच हुशार
भांगरभूंय | प्रतिनिधी
पांजर्यांत वचून भायरः रानां खात्याच्या यत्नांचेर उदक
दिवचल: मुळगांवांतल्या गांवकारवाड्यार फाटल्या कांय दिसां सावन बिबट्याचो वावर चालूच आसा. एक पाळिल्लो सुणो तोंडांत घेवन व्हरतनाचो बिबट्याचो व्हिडिओ व्हायरल जाले उपरांत दोन दिसांनी तो बिबटो परत खाणाच्या सोदांत आयिल्ले कडेन परत सीसीटिव्ही कॅमेर्यांत दिसलो.
रान खात्याक हे विशीं पयलींच म्हायती दिल्ली. उपरांत तांणी बिबट्याक धरपा खातीर ताचे वाटेर पांजरो दवरून सांपळो रचलो. त्या बिबटो त्या पिंजर्यांत भितर सरूनय परत भायर आयलो. आडखळ नासतना. दोन फावटीं घडिल्ली ही घडणूक सीसीटिव्ही कॅमेऱ्यांत दिसल्या.
हो सांपळो रचले उपरांत बिबटो दोन दीस पांजऱ्याच्या आशिकुशीक भोंवतना दिसलो. दोन फावटीं तों पिंजर्यांतूय वचून आयलो. तो चड भितर वचूंक नाशिल्ल्यान दार सकयल पडूंक नासतलें, असो दुबाव आसा. फळयेचेर बिबट्याचें वजन पडटांच भायलें दार पडटलें अशी ह्या सांपळ्याची वेवस्था केल्ली. पूण बिबटो पांजर्यांत अर्द्यारूच भितर सरून परतलो.
सध्या हो बिबटो मुळगांवां आनी आशीकुशीच्या वाठारांत मध्यानरात, फांतोंडेर ओर्राद भोंवतना दिसता. गांवची सुणीं, माजरां ताणें खावन उडयल्यांत. हो बिबटो पांजर्यांत सांपडमेरेन लोकांच्या मनांत भंय कायम आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
