भांगरभूंय | प्रतिनिधी
आमी गणपतीची पुराय काळजा सावन उपासना करतात. आमचे कडल्यान कसलीच चूक जावची न्हय हाची आमी सदांच जतनाय घेतात. चवथीचे कितलेशच दीस पयलीं सावन व्हड उमेदीन चवथीचे तयारीक लागतात. घरां दारां… दर एकलो गणेश भक्तीन भारावन वता. सगली कडेन भक्तीमय वातावरण तयार जाता. कांय कडेन देड दीस, पांच दीस, सात दीस, णव दीस, इकरा दीस गणपती पुजतात. पूण गणेश मुर्तींचें विसर्जन केले उपरांत दुसऱ्या दिसा वा कांय दिसांनी मुखार येवपी दृश्य पळोवन खूब दुख्ख जाता. गणेश मुर्तींचें विसर्जन जातकच आयिल्ले मुर्तीचे व्हिडियो व्हायरल जावपाक लागतात तें पळोवन काळजांत खूब दुख्ख जाता. काळीज सामकें रडटा.
दर वर्सा सरकार आमकां आव्हान करता की कोणेंच पुजे खातीर पीओपी (प्लास्टर ऑफ पॅरिस) मुर्ती हाडची न्हय, पीओपी मुर्ती हाडप कायद्यान बंदी आसा. तरी पूण इतले सांगून लेगीत आयज आमी पळयतात की कांय लोक पुजे खातीर पीओपी (प्लास्टर ऑफ पॅरिस) मुर्ती हाडटात. अशी मुर्ती बुडयल्यार ती पीओपीची आशिल्ल्यान ती विरगळूंक शकना, आनी मागीर ती उदकांतल्यान भायर सरून दर्यादेगेर सामकी वायट स्थितींत पडिल्ली दिसून येता. कितलेशेच दीस त्यो मुर्ती वायट स्थितींत पडिल्ल्यो नदरेक पडटात. हें आमच्या देवाक अपवित्र करपा सारकें आसा. हें कितलें बरोबर आसा हाचो सगल्यांनी विचार करपाक जाय. कारण आमी पुजतात त्या देवाक आमी कित्याक अपवित्र करचें, अशें कित्याक करचें? हें योग्य आसा काय? हाचेर विचार करप खूब गरजेचें. सगल्या भक्तांक नमळायेची विनंती करतां की आमी ही चूक करतात ती चुक हाचे मुखार तरी करची न्हय. कारण ज्या देवाक आमी पयलें स्थान दितात, ज्या देवाचेर आमी व्हड श्रध्देन विस्वास दवरतात ताचीच अशी बिटबंना करप हें सामकें चुकीचें.
घडये कांय जाण पीओपी मुर्ती हाडपाक पसंत करतात. कारण ती चड जाड नासता. मातयेच्यो मुर्ती मात्श्यो जाड आसतात हें खरें आनी तें सैमीक. मुर्ती ल्हान आसली तरी उपकारता, पूण पीओपी मुर्ती आसूंक फावना, कारण आपली मूर्त व्हड आसूंक जाय अशें देवान केन्नाच सांगिल्लें ना. वा खंयच्याच कायद्यांत बरयिल्लें ना. मूर्त ल्हान आसली तरी ती देवाचीच आसता. ल्हान-व्हड अशें कांयच आसना. आमची देवाचेर श्रध्दा आसप म्हत्वाचें आसता.
पीओपी (प्लास्टर ऑफ पॅरिस) मुर्ती तयार करपाक सोंपी आशिल्ल्यान व्हड आकाराच्यो मुर्ती तयार करप शक्य जाता आनी कारागिरांक अर्थीक नदरेन सोयीचें आसता. ह्यो मुर्ती दृश्टीन आकर्शक आनी टिकावू आसतात हें खरें, पूण पर्यावरणाक हानीकारक आशिल्ल्यान तांचो वापर करपाक बंदी घालपाची मागणी आसा.
पीओपी (प्लास्टर ऑफ पॅरिस) पसून तयार केल्ल्याे गणेश मुर्ती उदकांत विरगळनात. ताका लागून न्हंयो, तळीं आनी दर्यांतलें उदक दुशीत जाता. म्हणून पर्यावरणाक खूब हानिकारक आसतात. हाका लागून उदकांतल्या जिवांचें आनी वनस्पतींचें जिवीत घाताक पडटा. तशेंच मुर्ती बुडोवपा खातीर तयार केल्ल्या तळ्यांचीय स्थिती इबाडटा. ते भायर पीओपींत आशिल्ले रसायनीक घटक पर्यावरणाक आनी मनशाचे भलायकेक लुकसाण करतात.
ह्या सगल्या कारणांक लागून पर्यावरणवादी आनी जायत्यो संस्था पीओपी मुर्ती बदला मातयेच्यो मुर्ती वापरपाचो आग्रो धरतात. कारण मातयेच्यो मुर्ती पर्यावरणाक सुरक्षीत आनी सैमीक आसतात.
हो लेख बरोवन कोणाच्योच भावना दुखोवपाचो म्हजो हेत ना. जें कितें दृश्य दोळ्या मुखार आयलां ताच्याच आदारान मनांतलीं उतरां मुखार दवरपाचो ल्हानसो यत्न.
सत्यवान जांगळी
9923697659
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
