भांगरभूंय | प्रतिनिधी
कलाकारांक जात आसना. पूण मुर्ती कलाकाराक जातीचो कलाकार म्हणू येता.
संवसारांत जायत्या तरांचे कला प्रकार आसात. देखीक- नाट्य कला, नृत्य कला, गायन कला, चित्रकला आनी अशी जायत्या तरांची कला मनशाच्या आंगांत आसता आनी आमी तांचो जिवीत आनंदी करपाक पुरेपूर उपभोग घेत आसतात आनी तांतलीच एक अमुर्ताक मूर्त स्वरूप दिवपी श्रेश्ठ कला म्हणजे, मुर्तीकला. संवसारांतलो प्रत्येक मनीस हो कलाकार. आनी ते कलेच्या म्हालवजार तो आपणा सयत हेरांकूय सुखी करपाचो यत्न करीत आसता. पूण मुर्तीकला ही चड सुखदिणी आनी मनरिजवण करपी कला जावन आसा अशें हांव तरी मानता. भुरगेपणांत आमी हे कलेंत तल्लीन जावन खेळटात. ल्हान- ल्हान मातयेची खेळणी करून, खेळण्यांतली घरा बी बांदून आमच्या आंगांतले कलेचो आमी सराव करतात. जस जशी आमची वाड जाता, आमच्या आंगांतलेय कलेची वाड जायत रावता. आनी जेन्ना आमची कला दुसर्याचे नदरेंत येता. तेन्ना आमी कलाकार जातात, एक मुर्तीकार जाता.
मुर्तीकला ही मुर्तीकाराच्या मनांतली एक सुंदर येवजण. ती सत्य स्वरूपांत हाडपाक विचार शक्तीची खुब्ब गरज आसता. मातयेची मुर्ती करपाक दोन गजालींची गरज आसता. पयली गजाल म्हणल्यार फाव तशी मोस्तून एकजीव केल्ली चिकण माती, आनी दुसरी मुर्तीकाराच्या आंगांत आशिल्ली कुशळटाय. मुर्ती तयार करतना, त्या मुर्तीकारान जाची मुर्ती आपूण तयार करतलो, ताचें चित्र आपल्या मनांचें फासकेंत घालूक आदीं पक्कें करूक जाय. दैवी मुर्ती तयार करतना प्रत्येक मुर्तीकारान आपले मन, काळीज, अंतस्करण साफ आनी शुद्ध दवरूंक जाय. तशेंच ताणें फावो ती जतनाय घेवन मुर्ती काम करूंक जाय. मुर्ती तयार करचे पयली, मुर्तीकारान मूर्तेक बरें तरेन आकृती दिवचे खातीर बरें तरेची अवजारां वापरूंक जाय. चिकण मातये वांगडा आपल्या पांयां पोंदाक जेन्ना गोरा कुंभारान आपल्या स्वताच्या भुरग्याक मस्तिलो, तेन्ना सावन कुंभाराचे मातये कलेक तांबसो रंग चडलो.
सगळ्यांच्याच नशिबांत मुर्तीकार जावप आसना. खुबूच भाग्यवान आसता तोच मुर्तीकार जाता. ताची मुर्तीकला हीच ताचे कलेची वळख आनी ताच्या मनाक धादोसकाय भेटोवपी साधन आसता. कलाकारांक जात आसना. पूण मुर्ती कलाकाराक जातीचो कलाकार म्हणू येता. आमच्या समाजांत साप्प उणे मुर्तीकलाकार आसात. आनी तांतूतलो हांव एक हें सांगतना म्हाका अभिमान दिसता.
अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
