भांगरभूंय | प्रतिनिधी
वास्को: अयोध्येंत श्रीराम मुर्ती प्रतिश्ठापने निमतान सोमारा सकाळ सावन सांजवेळा उसरां मेरेन विवीध देवळांनी आनी हेर सुवातांनी विवीध धर्मीक कार्यावळीचें आयोजन केल्ल्यान वातावरण भक्तीमय जाल्लें. हे कार्यावळींत मंत्री मॉवीन गुदिन्हो, मुरगांवचे आमदार संकल्प आमोणकार, वास्कोचे आमदार कृष्णा साळकार तशेंच नागरीक भक्तीभावान वांटेकार जाल्ल्याचें दिसून आयलें.
वास्कोचें दामोदर मंदीर, वरुणपुरीचें राम मंदीर, बोगमाळोचें साई बाबा मंदीर, कृष्ण मंदीर, नवे वाडेंचें श्रीसंतोषी माता मंदीर, दुर्गा माता मंदीर, गणपती संस्थान, खारीवाड्या वेलें महालक्ष्मी मंदीर, सड्या वेलें इस्वटी ब्राह्मण लक्ष्मीनारायण मंदीर, साई बाबा मंदीर, वाड हांगाचें राष्ट्रोळी ब्राह्मण संस्थान, बायणाचें गोमंतेश्वर मंदीर, मेस्तावाड्या वेलें राम मंदीर, ओवळेश्वर गोपाळकृष्ण मंदीर तशेंच हेर सुवातांनी भजन, आरत्यो, महाप्रसाद तशेंच विवीध कार्यावळींचें आयोजन केल्लें. कांय कडेन मिरवणुको काडल्यो. जाग्याजाग्यांनी रोशणाय केल्ली. वाहनांचेर जय श्रीरामाचे भगवे बावटे लायिल्ले सगले कडेन नदरेक पडटाले.
एकूण पळयत जाल्यार चडशे जाण काल फक्त रामनामांत मग्न आशिल्ले. मुरगांव, वास्को, दाबोळी मतदारसंघांनी सर्ती आयोजीत केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
