भांगरभूंय | प्रतिनिधी
विशाल नायक: म्हालांतल्या भंडारी समाजाची जनगणना बेगीन सुरू करची
वास्को: मुरगांव म्हालांतल्या महसूल विभागा कडेन चडांत चड भंडारी समाजांतल्या लोकांचे कूळ, मुंडकार संबंदीत प्रकरणां फाटल्या तीन पिळग्यां सावन प्रलंबीत आसात. तीं रोखड्या रोखडीं निकालांत काडचीं, हे खातीर सरकारा कडेन उपाय काडपा खातीर केंद्रीय समितीच्या पालवान यत्न करतले अशें मुरगांव म्हाल भंडारी समाजाचे नवे अध्यक्ष विशाल नायक हांणी काल (शुक्रारा) सांगलें.
मुरगांव म्हालांत समाजाची जनगणना करपा खातीर आमचेर जी जापसालदारकी सोंपयल्या ती आमी येसस्वीपणान सांबाळू अशें तांणी स्पश्ट केलें.
विशाल नायक हांचे अध्यक्षताये खाला नवे समितीन पदभार स्विकारचे पयलीं हांगासरलें ग्रामदैवत दामोदर देवाक श्रीफळ ओंपून आशिर्वाद घेतलो.
ह्या वेळार केंद्रीय समितीचे जोड भांडारी अवधूत नायक, वांगडी मंगलदास नायक, आदले अध्यक्ष भानुदास नायक, नगरसेवक दामू नायक, चिखलीच्यो पंच वांगडी निलम नायक, अशोक मांद्रेंकार तशेंच समितीचे पदाधिकारी, वांगडी तशेंच समाजभाव हाजीर आशिल्ले.
विशाल नायक हांणी म्हणलें, कुठ्ठाळी मतदारसंघांतल्या भंडारी समाजाची जनगणना रोखडीच सुरू करतले. उपरांत दाबोळी, वास्को आनी मुरगांव मतदारसंघांतल्या भंडारी समाजाची जनगणना हातांत घेतले. समाजाक शिक्षण, रोजगार, भलायकी बी संबंदी ज्यो समस्या भेडसायतात त्यो केंद्रीय समिती मुखार दवरतले. मुरगांव म्हालांतलो भंडारी समाज एकसंघ आसा. ताका लागून हेर समित्यो बी नात.
मुरगांव म्हाल भंडारी समाजाची नवी समिती मुखार दिल्ले प्रमाण आसा.
अध्यक्ष- विशाल नायक, सरचिटणीस- अरुण रेडकार, भांडारी- अभिराज चोपडेंकार, उपाध्यक्ष- संतोष केरकार, विश्वास के. नायक, नारायण जी. नायक, विनोद किनळेकार, लवू नार्वेंकार, संजय सातार्डेकार, गोविंद मांजरेकार, गोविंद पेनुलकार, जोड सचीव- प्रवेश पी नायक, संतोष एन. नायक, अॅड. शिवानंद नायक, महेश पालयेंकार. जोड भांडारी- स्वराज नायक, हरिश्चंद्र जोशी, अॅड. संतोष नायक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
