भांगरभूंय | प्रतिनिधी
आमदार आमोणकार हांणी घेतली अदानी कंपनीच्या अधिकार्यांची भेट
वास्को : मुरगांव बंदराचेर कोळसो हाताळटना येवपी दुर्गंध आडावपाचे मागणे वेल्यान आमदार संकल्प आमोणकार हांणी शिश्टमंडळा सयत अदानी कंपनीच्या अधिकार्यांची भेट घेतली. घाण आडावपा विशीं कंपनीन २४ वरांनी लेखी बरोवन दिवपाचें उतर दिलां.
अदानी कंपनीच्या अधिकार्यांकडेन कोळसो हाताळतना येवपी दुर्गंध आनी समस्यां विशीं चर्चा जाली. दुरुस्तीच्या उपाय येवजण्यां विशीं लेखी हमी आनी प्रस्न सोडोवपाक निश्चीत कालमर्यादा दिवपाची तांणी मागणी केली.
प्रदूशणाच्या मुद्यांचेर तोडगो काडी मेरेन एमपीए आनी कोळसो हाताळणी करपी युनिट्सां आड लढो चालूच उरतलो अशें तांणी स्पश्ट केलें. कंपनी कडल्यान २४ वरां भितर लेखी बरोवन दिवपाचें आस्वासन दिल्ल्याचें आमदार संकल्प आमोणकार हांणी सांगलें.
थळाव्यां सोंसचे पडटात त्रास
मजगतीं, कोळसो प्रदूशण आनी दुर्गंधाक लागून थळाव्यांक बरेच त्रास सोंसचे पडटात. फाटल्या कांय दिसां आदीं ग्रामस्थांनी आमदार आमोणकार हांच्या नेतृत्वा खाला मोर्चा काडून कोळसो प्रदूशण, घाणयारो वास बंद केलो ना जाल्यार बंदराच्या मुखेल गेटी भितर सरून आंदोलन करपाची शिटकावणी दिल्ली. कांय समाजवावुरपीय कोळशा आड फाटले बरेच म्हयने विवीध मार्गांनी आंदोलनां करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
