भांगरभूंय | प्रतिनिधी
पणजीः मुरगांव बंदरांत पीपीपी तत्वाचेर खाजगी प्रकल्प येवन फाटल्या दोन वर्सांनी १६१ कोटीचो महसूल जोडून दिला. देशांतल्या ९ मुखेल प्रकल्पां मदीं सगळ्यात उणी येणावळ खाजगी गुंतवणूकी वरवीं करपी गोंयचो मुरगांव बंदर दुसरे वळेरेर आसा, अशी म्हायती केंद्रीय बंदर, जहाज आनी जलमार्ग मंत्रालयान दिल्या.
देशांतल्या मुखेल बंदराच्या सुविधांक बळ दिवपा खातीर आनी तांचें आधुनिकरण करपा खातीर खाजगी क्षेत्राची मुखेल घटक म्हण केंद्र सरकारान निवड केल्या. देशांत केंद्रीय सरकारच्या प्रशासकीय नियंत्रणा सकयल १२ मुखेल बंदर आसात. जे बिगर मुखेल बंदर आसात ते राज्य प्रशासन वा मॅरीटायम बोर्डाचे नियत्रणा सकयल येता. फाटल्या पांच वर्सांत वट्ट २५ पीपीपी तत्वाचेर प्रकल्प हाडून रु. १३,३५५ कोटी इतली येणावळ ह्या खाजगी कंपन्यांनी बंदराक दिल्या.
राज्यांतल्या मुरगांव बंदर प्राधिकरणांत २ प्रकल्प पीपीपी तत्वाचेर वर्स २०२३-२४ वर्सा सुरु जाल्ले. फाटल्या दोन वर्सांच्या काळांत बंदराक ह्या दोन खाजगी कंपन्यांनी आपल्या प्रकल्पा वरवीं १६१ कोटी इतली येणावळ जोडून दिल्या. जाल्यार सगळ्यांत उणी पीपीपी वरवीं येणावळ तयार करपी संदर्भांत गोंय हें देशांतल्या मुखेल बंदरा मदीं दुसरे वळेरेर आसा. जाल्यार न्यू मंगळूर बंदर हें १०७ कोटीच्या गुंतवणूकी सयत पयले वळेरेर आसा.
जाल्यार मुरगांव बंदराच्या कार्गो हाताळणींत फाटल्या १० वर्सांनी ४४.८८ टक्के इतली वाड नोंद जाल्या. वर्स २०१४-१५त मुरगांव बंदर प्राधिकरणाची कार्गो हाताळणी तांक ४३.७६ मीलीयन टन इतली आसली आनी आतां वर्स २०२४-२५सात ही कार्गो हातळणी तांक ६३.४० मीलीयन टन मेरेन पावल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
