भांगरभूंय | प्रतिनिधी
भांगरभूंय । प्रतिनिधी
वास्कोः मुरगांव बंदरांत पर्यावरणाचेर वायट परिणाम जावचो ना हाची जतनाय घेवंन चडांत चड वेव्हार करतले अशें मुरगांव बंदर प्राधिकरणाचो अध्यक्ष म्हणून ताबो घेतल्या उपरांत घेतिल्ले पयलेच पत्रकार परिशदेंत डॉ एन विनोदकुमार हाणे सांगलें. बंदरांत चड करून ग्रीन कार्गाची हाताळणी जातली अशें तांणी स्पश्ट केलां.
पयलेच फावट बंदर प्राधिकरणाचो अध्यक्ष म्हणून काम करपाची संद मेळ्ळ्या. बंदरांतल्या कामकाजाची हांव म्हायती घेतलो. दरेका बंदराची वेगवेगळे तरेची तांक आसता. मुरगांव बंदरांतल्या तांकीचो चडांत चड उपेग जातलो अशी वेवस्था करून चडांत चड कार्गो हाडपा खातीर आपूण वावुरलों अशें ताणे सांगलें. बंदरांतल्या वेव्हाराचो पर्यावरणाचेर परिणाम जाता ही जरी खरी गजाल आसली तरी पर्यावरणाचेर चड परिणाम जावचो ना हाची जतनाय आमकां घेवची पडटली अशें तांणे सांगलें. बंदरांतल्या वेव्हाराचो समाजाक आनी गोंयकारांक फायदो जावचो आनी चडांत चड लोकांक रोजगार मेळचो हाचे कडेन आपूण लक्ष दितलों अशेंय तांणे सांगलें.
गोंयांत 2017 तें 2021 मजगतीं पोस्टमास्टर जनरल म्हणून काम करपाची संद आपल्याक मेळल्ली, आता गोंयांत काम करपाची परत संद मेळ्ळ्या. गोंयांत सगळे कडेन पोस्ट ऑफिसां आशिल्ल्यान आपल्याक गोंयांत सगळे कडेन फिरपाक मेळ्ळें. आतां एमपीएच्या माध्यमांतल्यान गोंयकारांची सेवा करपाची संद आपल्याक मेळ्ळ्या आनी आपूण तिचो पुरायपणान उपेग करतलों अशें तांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
