भांगरभूंय | प्रतिनिधी
यॉट्साची येवकाराची तयारी चल्ल्या
वास्को : मुरगांव बंदर प्राधिकरण (एमपीए) समर्पीत पार्कींग आनी सेवा सुविधाये सयत क्रूझ लायनर्सूच न्हय, यॉट्साची येवकाराची तयारी करता. सुत्रांच्या मता प्रमाण, हो म्हत्वाचो प्रकल्प मुरगांव बंदरांत येवपी संवसारीक दर्जाच्या क्रूझ टर्मिनलाच्या वाठारांत येतलो.
ही येवजण सोपी आसा, मात ‘गेम चेंजिंग’ आसा: गोंय बर्याच काळा सावन संवसारीक प्रवाशांक आकर्शीत जरी करता तरी डॉकींग आनी हेर सुविधा सोदपी खाजगी यॉट धनी आनी चार्टर ऑपरेटरांच्या वाडपी वर्गाक केन्नाच खरेंच मजत करपाक पावूंक ना. हो उणाव एमपीए भरून काडपा खातीर उत्सुक दिसता.
आमी राज्यांत क्रूझ पर्यटन वाडोवपा खातीर पयलींच संवसारीक दर्जाचें क्रूझ टर्मिनल विकसीत करतात, एमपीएच्या एका वरीश्ठ अधिकार्यान सांगलें.
ह्या टर्मिनलांत देशा खाला आनी आंतरराष्ट्रीय क्रूझ बोटी आसतल्यो, जाका लागून वेवसाय आनी थळावी अर्थवेवस्था चालीक लागतली.हाचे वांगडाच, अमी बंदर वाठारांत मरिना सारकीच नौका पार्किंगची सुवात उपलब्ध करून दिवपाचो निर्णय घेतलो. मागणी वाडल्या आनी आमकां एक संद मेळ्ळ्या जी वापरपा सारकी आसा.
ह्या नौका पार्किंग वाठाराचें काम पयलींच सुरू जालां. जें २०२७ मेरेन पुराय जावपाची अपेक्षा आसा. सगल्यो वेवस्था पुराय जाल्यात. उच्च दर्जाच्या देशा खाला आनी परदेशी पर्यटकांनी वापरिल्ल्या नौकां खातीर हे सुवातेर पार्कींग आनी संबंदीत सुविधा आसतल्यो, अशें सुत्रांनी सांगलें.
म्हत्वाचें म्हणल्यार, एमपीएन स्पश्ट केलें, ह्या उपक्रमाक सांकवाळे बेसाठी प्रस्तावीत केल्ल्या वादग्रस्त मरिना प्रकल्पा खातीर चुकीचें समजचें न्हय. हो प्रकल्प पुरायेन वेगळो. आमी मरिना बांदिनात. फकत पार्किंग सुविधा आसा. वांटप केल्ल्यो सुवातो निश्चीत आशिल्ल्यान, आसपाव घेवपी नौकांचो आंकडो तांच्या आकाराचेर निंबून आसतलो, अशें अधिकार्यान स्पश्ट केलें. एकदां पुराय जाले उपरांत, ही सुविधा निविदा प्रक्रिये वरवीं निवडलेल्या खाजगी एजन्सी वरवीं चलयतले. ऑपरेटर डॉकिंग मजत, इंधन भरप आनी हेर लॉजिस्टीक सेवां सयत सदचें वेवस्थापन सांबाळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
