भांगरभूंय | प्रतिनिधी
भांगरभूंय । प्रतिनिधी
मुरगांवः मुरगांव पालिकेचो नवनिर्वाचीत मुख्याधिकारी दिपेश प्रियोळकार हांणी पालिका मार्केटांतल्या दुकानांची परवानो नूतनीकरण कागदपत्रांची तपासणी करून थकबाकी वसुली मोहीम सुरू केल्या. मार्केटातले दुकानदार, वेवसायीक आस्थापना आनी वेवसायिकां कडल्यान पालिकेक कोट्यांनी रुपये येणे आसात. पयशे नाशिल्ल्यान पालिकेक आपल्या कर्मचाऱ्यांक वेळार पगार दिवपाक मेळना. थकबाकी वसुलीक आपणे प्राधान्य दिलां अशें ताणे सांगलें. परत घरपट्टी नोंदणी करपाचे काम करतले अशें प्रभारी नगराध्यक्ष रामचंद्र कामत हाणे सांगलें.
मुरगांव पालिकेक पालिका मार्केट, खाजगी वेवसाय आनी आस्थापनांतल्यान कर थकबाकींतल्यान कोट्यांनी रुपये येणे आसात. नोटिशी धाडून लेगीत थकबाकी भरपा कडेन वेवसायीक आनी दुकानदार आडनदर करतात. ताका लागून दुकांनांनी वचून कागदपत्रा पळोवन थकबाकी वसुली खातीर दुकानदारांक तयार करपाचें काम हातांत घेतलां. बिरेस्तारा रामचंद्र कामत आनी प्रियोळकार हांच्या फुडारपणा खाला पालिका लेखा अधिकारी उदय वाडकार, पालिका निरीक्षक सचीन पडवळ, योगेश देसाय, प्रसासकीय अधिकारी मंगलदास खांडेपारकार, मच्छिंद्र मांद्रेकार, गौरेश पार्सेकार आनी कर्मचाऱ्यांनी दुकांनाची कागदपत्रां तपासपाचें काम केलें.
पालिकेच्या येणावळींत वाड करपाचें काम आमी हातांत घेतलां. थकबाकी वसुलीक आमी प्राधान्य दिलां अशें दिपेश प्रियोळकारान सांगलें. घरपट्टी वसुली खातीर घर धनयांक नोटिशी धाडटले. नव्या घरांक घरपट्टी लागू करतले अशी म्हायती ताणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
