भांगरभूंय | प्रतिनिधी
नगराध्यक्षाचेर अविस्वास हाडपाची चल्ल्या पूर्वतयारी ?
भांगरभूंय । प्रतिनिधी
वास्कोः मुरगांव पालिका मंडळान बिरेस्तारा आपयिल्ले साबार बसकेक 14 वांगडी गैरहाजीर राविल्ल्यान तो चर्चेचो विशय थारला. कांय प्रभागांतल्या उदरगतीच्या कामांक नगराध्यक्ष प्राधान्य दिना, तशेंच आपणांक विस्वांत घेना, असो कांय नगरसेवकांचो दावो आशिल्ल्याचें कळ्ळां.
आमी अजून मेरेन तरी सगळे एकवटीत आसात. भिवपाची गरज ना. ते वांगडी घडये तांकां म्हत्वाचें काम आशिल्ल्यान येवंक नासतले, असो दावो मुरगांवचे नगराध्यक्ष गिरीश बोरकार हांणी केला.
जर आमच्या प्रभागांतली उदरगतीचीं कामां चालीक लागचीं नात जाल्यार फुडली बसका घेवं नाकात. आमी येवचे नात, अशी शिटकावणी बिरेस्तारा जे बसकेक हाजीर आशिल्ले तातूंतल्या कांय जाणांनी दिल्या. ते खातीर सध्या तरी प्रभागांतल्या उदरगतीच्या कामांचो प्रस्न साणीर आयला. नगराध्यक्षाचेर अविस्वास थाराव हाडपाची ही पूर्वतयारी बी न्हय मूं, असो दुबाव कांय जाण उक्तायतात.
मुरगांव पालिका मंडळाचे बिरेस्तारा आपयिल्ले बसकेंत म्हत्वाच्या प्रस्नाचेर चर्चा करपाची आसली. सकाळीं बसका सुरू जाली तेन्ना नगराध्यक्ष गिरीश बोरकार, उपनगराध्यक्ष रामचंद्र कामत, मुख्याधिकारी दीपेश प्रियोळकार हांचे सयत नगरसेवक दीपक नायक, सुदेश भोसले, प्रजय मयेंकार, दामू कासकार, दामू नायक, विनोद किनळेकार, अमेय चोपडेंकार, शमी साळकार, मंजुशा पिळर्णकार हाजीर राविल्ले. ही साबार बसका आशिल्ल्यान बसका सुरू जावचे आदीं गणपुर्ती फावोशी आशिल्ली. पूण हे बसकेक 14 नगरसेवक- नगरसेविका हाजीर रावूंक नाशिल्ल्यान रितीं कदेलां लक्ष ओडून घेतालीं. हे बसकेंत कांय म्हत्वाच्या प्रस्नांचेर चर्चा जाली आनी निर्णय घेतले. पूण आमच्या प्रभागांतलीं उदरगतीचीं कामा जावचींच नात जाल्यार फुडली बसका आपोवं नाकात, अशें नगराध्यक्ष बोरकार हांकां सांगलें.
दरेका प्रभागांतली उदरगतीच्या कामांची जी वळेरी दिल्ली, ते संबंदांतल्यो फायली पालिका संचालका कडेन धाडिल्ल्यो. ताचेर सयो जाल्यात. आतां त्यो नगरविकास कार्यालयांत आसात. थंयच्यान त्यो रोखड्योच येतल्यो, ते उपरांत कांय दिसांनी कामांक सुरवात जातली, अशें नगराध्यक्ष बोरकार हांणी सांगलें.
बिरेस्तारा जाल्ले बसकेंत मुरगांव पालिका मार्केटांतल्या दुकानांच्या भाड्या संबंदांत चर्चा केली. फाटल्या कितल्याश्याच वर्सांच्यान ह्या प्रस्नाचेर उपाय येवंक ना. ताका लागून पालिकेच्या महसुलाचेर परिणाम जाता. ते खातीर त्या दुकानकारांची आनी पालिका मंडळाची जोडबसका घेवन उपाय काडटले आनी तो प्रस्ताव धाडटले. 14 व्या वित्त निधी वरवीं थंय मटण मार्केट बांदपा संबंदांत चर्चा जाली. ते खातीर पयशे उणे पडल्यार ते वास्कोचे आमदार सरकारा कडल्यान हाडटले. तशेंच आनीक एक मार्केट बांदपाचें थारिल्ले. ते खातीर एक कोटीचो निधी हाडला. पूण प्रत्याक्षांत खर्च एक कोटी 81 लाख रुपया खर्च येतलो. हे खातीर पालिका वयले 81 लाख रुपया दितली. फुडारांत सड्यार भोवउद्देशी मार्केट सुरू जातलें, अशें नगराध्यक्ष बोरकार हांणी सांगलें.
आमच्या प्रभागांत कसलींच उदरगतीचीं कामां जावंक नाशिल्ल्यान लोक आमकां विचारतात. तांकां जाप कशे दितले, असो प्रस्न बसकेक हाजीर आशिल्ल्या कांय जाणांनी उपस्थीत केलो. कांय कामांच्यो निविदा काडिल्ल्यो. पूण कामाची ऑर्डर मेळूंक नाशिल्ल्यान कामां फुडें वचूंक नात. तीन वर्सांत आमच्या प्रभागांनी कामां जावकूंच नात. आतां जे मेरेन कामां सुरू जायनात, ते मेरेन बसका आपोव नाकात, अशें आपणे नगराध्यक्षाक सांगलां. उदरगतीचीं कामां कित्याक जायनात, तें आमकां नगराध्यक्षान सांगूंक ना, अशें दीपक नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
