भांगरभूंय | प्रतिनिधी
भांगरभूंय । प्रतिनिधी
मुरगांवः नव्या भाजी मार्केटांतल्या दोनूय वटेच्यो शिमो थारायनास्तान मुरगांव पालिका मंडळान विक्रेत्यां आड केल्ली कारवाय म्हणल्यार हुकूमशाय, मनमानी आनी सैमीक न्यायाचें उल्लंघन आसा असो दावो भाजी मार्केटांतल्या विक्रेत्यांनी केला. नगरपालिका कायद्यांतल्या नेमांक पाळो दिवंन केल्ले कारवायेचो परत एक फावट विचार करून आमची सतावणूक बंद करची अशी मागणी तांणी पालिका मुख्याधिकाऱ्याक एक निवेदन भेटोवन केल्या. भाजीपालो रोखडोच पिड्ड्यार जाता. ताका हवा लागपाची गरज आशिल्ल्यान पालेभाजी, दुकान आनी रस्त्या मदीं एक मीटर सुवात सोडची अशी मागणी तांणी परत एक फावट केल्या. निवेदनाचेर सुमार शंबर भाजी विक्रेत्यांच्यो सयो आसात.
नव्या भाजीपालो मार्केटांतले विक्रेते रस्त्या कडेन आपलो वेवसाय करतात. तांणी थंय दुकानां उबारल्यांत. मात तातूंत उबें रावन माल विकनास्तना दुकाना भायर तशेंच रस्त्यार अतिक्रमण करून माल विक्री करतात. ताका लागून मार्केटांत येवपी गिरायकांची गैरसोय जाता. रस्तो आडायल्ल्यान गर्दी जातात. ताका लागून कांय फावट वादाचे प्रसंग उप्रासतात. रस्तां वयलीं अतिक्रमणा काडचे पयलीं पालिका मंडळान विक्रेत्यांक अतिक्रमणा आपूण जावन काडचीं अशें सांगिल्लें. मात पालिका मंडळ आमचें कांयच करपाक शकना अश्या भ्रमांत आशिल्ल्या विक्रेत्यांक पालिका मंडळान दणको दिलो. कांय जाणांचो माल जप्त केलो. आमी पालिका मंडळाक सहकार्य करीत आयल्यात असें सागून ह्या विक्रेत्यांनी आतां पालिका मंडळाक कायद्याची भास शिकोवपाक सुरवात केल्या.
पालिका मंडळाक दिल्ल्या निवेदनांत तांणी कायद्याचें उल्लंघन करनाकात असो तांका सल्लो दिला. गोंय नगरपालिका कायद्याच्या कलम 169 प्रमाण भोशीक रस्ते खंयचे हें लोकांक कळपा खातीर सूचोवणे तकटे लावपाची गरज आसा. कलम 178 प्रमाण दरेका भौशीक रस्त्याची शीम थारावप गरजेचें आसा. मात मुरगांव पालिका मंडळान हें काम केलें ना हे तांणी नजरेक हाडून दिला.
नवीन भाजी मार्केटांतल्या रस्त्याचें दोनूय वटेन शीम थारावपाची गरज आसा. पालिका मंडळान ती थारायल्यार आमी ते शिमे भायर वच्चे नात. ताच्या भायर वचून विक्री केल्यार तांचे आड कारवाय करपाक जाय अशें तांणी सांगलां. कांय विक्रेते रस्त्यार अतिक्रमण करतात हें कांय पोरण्या विक्रेत्यांनी मानून घेतलां. कांय जाण रस्त्यार बसून लिंबू, कांदे, बटाट, नाल्ल आनी हेर भाजी विकतात. ताचें आड हे विक्रेते कांयच उलयनात अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
