भांगरभूंय | प्रतिनिधी
भांगरभूंय । प्रतिनिधी
मुरगांवः कंत्राटी कामगाराक दिसाक एक हजार रुपया पगार दिवपाचो निर्णय मुरगांव पालिका मंडळाच्या अर्थ संकल्पीय बसकेंत पास केला. ताची कार्यवाही जून म्हयन्यांतल्यान करतले. पालिका मंडळ ड्रायव्हर आनी नितळसाणीच्या कामां खातीर कंत्राटी कामगारांक कामार घेता.
बायणा हांगच्या रवींद्र भवनाच्या परिशद सभाघरांत पालिका मंडळाची नगराध्यक्ष गिरीश बोरकार हाचे येजमानके खाला बसका जाली. मुख्याधिकारी दीपेश प्रियोळकार, अभियंतो मनोज आर्सेकार तशेंच दीपक नायक, फॅड्रीक हेन्रीक, यतीन कामुर्लेकार हे नगरसेवक आनी नगरसेविका प्रिया राऊत, देविता आरोलकार, शमी साळकार हे बसकेक हाजीर आशिल्ली.
नगरसेवक फॅड्रिक हेन्नीक हाणे दिसवड्याचेर काम करपी कामगारांच्या पगारांत वाड करपाचो थाराव मांडलो. ताका यतीन कामुर्लेकार, दामू नायक आनी विनोद किनळेकारान तेंको दिलो. सध्या ह्या कामगारांक पालिका मंडळ 500 आनी पालिका प्रशासन खात्या कडल्यान 200 मेळून दिसाक 700 रुपये पगार दितात. पगार वाडीच्या थारावा प्रमाण जून म्हयन्या सावंन पालिका मंडळा वतीन 700 आनी पालिका प्रशाना कडल्यान 300 मेळून दिसाक एक हजार रुपया दितले अशें नगराध्यक्ष गिरीश बोरकार आनी मुख्याधिकारी दीपेश प्रियोळकारान सांगलें.
अर्थ संकल्पीय बसकेंत मुरगांव पालिका वाठारांत आशिल्ल्या व्हड आस्थापनां कडल्यान व्हडा प्रमाणात कर थकबाकी येवपाची आसा. ती वसूल करून घेवपाक नेट दितले अशें प्रियोळकारान सांगलें. बसकेंत हेर विशयांचेर चर्चा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
