मुरगांव पालिका मंडळाचे बसकेंत नौदलाच्या प्रतिनिधींचेर प्रस्नांचे फार

भांगरभूंय | प्रतिनिधी

भांगरभूंय । प्रतिनिधी
वास्कोः दाबोळी विमानतळ वाठारांत बांदकामां खातीर ना हरकत दाखले दितना नौदला वतीन जी सतावणूक जाता तातूंत गोंय सरकारान हस्तक्षेप करपाची गरज आसा, असो सुर मुरगांव पालिका मंडळाच्या मंगळारा जाल्ले  खाशेले जोड बसकेक हाजीर आशिल्ले नगरसेवक, बिल्डर आनी लोकांनी लायलो. बसकेक हाजीर आशिल्ल्य नौदल प्रतिनिधींचेर लोकांनी प्रस्नाचे फार सोडले. मात तांचे कडल्यान जाप मेळपाक शकली ना. ह्या प्रकरणांत नौदलान 30 दिसां भितर फावो तो तोडगो काडचो अशें सांगलां. तोडगो काडलो ना जाल्यार परत बसका घेतले अशें नगराध्यक्ष गिरीश बोरकारान सांगलें.
दाबोऴी  विमानतळाच्या चार किलोमीटर हवाई अंतरांच्या परिघांत कसलेंय बांदकाम करपा खातीर नौदलाचो ना हरकत दाखलो घेवपाची गरज आसा. ताका लागून फाटल्या चार-पांच वर्सां सावन बरींच बांदकामां प्रलंबीत आसात. ताचो फटको बिल्डरांक बसला, शिवाय पंचायत, पालिका हांचे महसुली येणावळीचेर लेगीत परिणाम जाला. कोणेय नौदला कडेन परवानगी मागपा खातीर फायल दिल्यार 90 दिसां भिरत ताचेर निर्णय घेवपाची गरज आसतना ताका  देड- दोन वर्सां लायतात अशें बसकेत सांगलें.
दाबोळीच्या फनेल विभागांत बांदकामां येतात असो दावो करून तीस- पस्तीस वर्सां पयलींचीं बांदकामां मोडटात असो आरोप संबंदितांनी नौदलाचेर केलो. चिखली, चिकोळणा बोगमाळो पंचायत  वांगड्यांनी नौदलाचे भूमिके विशीं नाराजी उक्तायली. नौदलाच्यो व्हडल्यो इमारती आसात मात तांचे कडल्यान मुरगांव पालिकेक एक पयसोय मेळना. थंयच्या फ्लॅटांचें भाडें दिवपाक नौदल तयार ना. ते विशीं चर्चा करपा खातीर मंगळारचे  बसकेक नौदलाच्या प्रतिनिधींक हजर रावपाक सांगल्लें. नौदल स्वता कायद्याचें उल्लंघन करता असो आरोप सेड्रीक डायस हाणे बसकेंत केलो. एका बिल्डरान नौदलाच्यो नोटिशी कशे तरेच्यो आसतात आनी ते संबंदितांक कश्यो त्रास दिवपी आसतात तें सांगलें.
नौदलाच्या व्हडल्यो राबितो वसणुको आसात मात तांची घरपट्टी नौदल दिना ताका लागून आमचो महलूल बुडटा अशें चिखली आनी बोगमाळो पंचायत वांगड्यांनी सांगलें. बसकेंत ज्यो समस्या मांडल्यात त्यो नौदल प्रतिनिधी तांच्या वरिश्ठांच्या कानार घालतले. ते संबंदी तोडगो काडपा खातीर तीन दिसांची मुजत दिल्या अशें नगराध्यक्ष गिरीश बोरकारान सांगलें. नौदलाचे सुमार चार हजार फ्लॅट आसात. ताची घरपट्टी तांणी स्थळाव्या यंत्रणेक दिवपाक जाय अशें परिपत्रक आसतना नौदल ती दिवपाक तयार ना. फकत नौदलाच्या जिवंती हॉस्पिटला कडल्यान घरपट्टी मेळटा अशें नगरसेवक फ्रेड्रिक्स हेन्निक्स हाणे सांगलें. वास्को शार दाबोळी विमानतळ चार किलोमीटर पयस आसा तरीय नौदला कडल्यान बांदकामां खातीर परवानगी घेवची पडटा. जाय तें स्पश्टिकरण नौदला कडल्यान मेळना. ताका लागून नौदला विशीं लोकाच्या मनांत बरी प्रतिमा ना अशे ताणे सांगले.
नौदलाचे भूमिकेक लागून मुरगांव पालिका मंडळाक बांदकाम शुल्क मेळपाक आडमेळे येतात. पयलीं बांदकाम शुल्कांतल्यान पालिकेक सुमार चार कोटी रुपये मेळटाले. आतां तो आंकडो 50 लाखांचेर पावला. ताका लागून आपल्या कर्मचाऱ्यांक पगार दिवपाक पयशांची वेवस्था करपाक हांगा थंय वच्चें पडटा अशें हेन्निक्सान सांगलें.
नौदलाचे भूमिकेक लागून चिखली पंचायतूच न्हय जाल्यार मुरगांव तालुक्याक फटके बसपाक लागल्यात अशें चिखलीचो सरपंच कमलाप्रसाद यादवान सांगलें. पालिका मंडळान जोड बसका घेतिल्ले खातीर ताणी नगराध्यक्षाचे उपकार मानले.