भांगरभूंय | प्रतिनिधी
कोळसो प्रदुशणाचेर नियंत्रण दवरपाक संकल्प आमोणकार अपेशी
मुरगांव : मुरगांव पालिकेचे अर्थ संकल्प बसकेंत म्हत्वाची चर्चा सोडून, अर्थ संकल्पाच्या विशयाचे सुवातेर बायणा एमपीएन उबारिल्ले गेटीचेर चड चर्चा रंगली. हाका लागून अर्थसंकल्पाक चड म्हत्व दिनासतना एमपीएचे गेटीचेर चड चर्चा जाल्ल्यान कॉंग्रेस फुडारी नझिर खान हांणी पालिकेच्या कामाचेर तिडक उक्तायल्या.
नगरसेवक दीपक नायक हांणी अर्थसंकल्पाचे बसकेंत एमपीएन महामार्गाच्या उड्डाणपुलाची देंवती वास्को बायणा हांगच्यान वता. ताचेर चड चर्चा करून अर्थसंकल्प योग्य तरेन मांडूंक नाशिल्ल्यान कॉंग्रेस फुडारी नझिर खान हांणी खर शब्दांनी नगरसेवक दिपक नायक आनी मुरगांव पालिकेचेर तिडक उक्तायली.
३० मार्च २०२५ दिसा मुरगांव पालिकेचो अर्थसंकल्प मांडिल्लो. मात बसकेंत चर्चा वेगळ्याच विशयाचेर जाल्ल्याचें नझिर खान हांणी शुक्रारा आयोजीत पत्रकार परिशदेंत सांगलें. अर्थसंकल्प बसके वेळार नगरसेवक दीपक नायक हांणी एमपीएन बायणा उबारिल्ले गेटीचेर चड चर्चा जाली. देखून अर्थसंकल्पा विशीं जनतेक चड म्हायती मेळूंक नाशिल्ल्याचो आरोप नझिर खान हांणी केलो. बसकेंत जो विशय आसा ताचेर चर्चा जावप गरजेचें आशिल्लें. मात नगरसेवक दीपक नायक, नगराध्यक्ष आनी हेर नगरसेवकांनी फकत गेटीचेर चड चर्चा केली. हाका लागून अर्थसंकल्प गडबडीन मांडिल्ल्याची म्हायती खान हांणी दिली.
ह्यान पयलीं दीपक नायक नगराध्यक्ष आशिल्ले तेन्ना तांणी एमपीए बंदरांतली कोळसो येरादारी वास्कोच्यान वचपा पसून आडायतले अशें जाहीर केल्लें. उपरांत दीपक नायक आनी मुरगांव पालिकेन कोळसो येरादारीचेर कसलीच कारवाय करूंक ना. उलट कोळसो मुरगांव बंदरांतल्यान आनीक चड प्रमाणांत निर्यात केली. मुरगांव पालिका लोकांक फटयता, असो आरोप खान हांणी केला. आमदार संकल्प आमोणकार कोळसो प्रदूशण आडायतलों अशें सांगत मिरयता. प्रत्यक्षांत मात कोळसो प्रदुशणाचेर नियंत्रण दवरपाक ते अपेशी थारल्यात, अशें नझिर खान हांणी सांगलें.
गोवा शिपयार्ड कंपनीन उबारिल्ल्या नव्या प्रशासकीय इमारतीक मुरगांव पालिके वरवीं ’भोगवटा प्रमाणपत्र ’ (वोकूफेशन सर्टिफिकेट) दिनासतनाय काम नेटान सुरू आसा. हें काम चुकीचें आशिल्ल्यान पालिकेन रोखडेंच गोवा शिपयार्डच्या नवे प्रशासकीय इमारतीचें काम बंद उडोवचें अशी पत्रकार परिशदेंतल्यान एलविनो अरावजो हांणी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
