मुरगांवां येरादारी करपी वेवसायीक आनी कामगार निर्यात करप्यांचो वेवसाय बंद करपाच्या मार्गार
भांगरभूंय | प्रतिनिधी
मुरगांव: मुरगांव पत्तन प्राधिकरणांतल्या (एमपीए) धक्को नं: १० आनी ११ खाजगीकरण केल्ल्यान, हांगा जायत्या वर्सां सावन स्टिव्हडोअर, येरादारी करपी वेवसायीक आनी कामगार निर्यात करप्यांचो वेवसाय बंद करपाच्या मार्गारआसा. हाचो निशेध म्हणून ४ एप्रील २०२५ सावन येरादारी करप्यांनी आपलो वेवसाय बंद दवरला. एमपीएन धक्को नं: १० आनी ११ एके खाजगी कंपनीक दिल्ल्यान, हांगा तीन वर्सां सावन काम करपी विवीध वेवसायीकांक व्हडा प्रमाणांत अर्थीक फटक्या वांगडा उपासमारीची वेळ आयिल्ल्याची म्हायती मुरगांव स्टिव्ह डोअर संघटना, वास्को येरादारी संघटणे वांगडा बंदरांत आपापले वेवसाय करप्यांनी दिली. हे विशीं मुख्यमंत्री डॉ. प्रमोद सावंत हांकां निवेदन सादर करून, मुरगांव बंदरांतल्या स्टिव्ह डोअर, येरादारी करप्याच्यो समस्या सोडोवपाची मागणी केल्या. मुख्यमंत्र्यांनी येवपी दोन दिसांनी तोडगो काडपाचें आस्वासन दिलां.
मुरगांव पत्तन प्राधिकरणांच्या बंदरात फाटल्या तीन वर्सां सावन वेवसाय करपी स्टिव्ह डोअर आनी येरादारी कंपन्यांक, धक्का नं: १० आनी ११ खाजगीकरण केल्ल्यान वेवसाय मेळोवपाक आडखळ निर्माण जाल्या. एके खाजगी कंपनीन धक्को नं.: १० आनी११चेर सगलीं यंत्रणां स्वता आयात केल्ल्यान हांगा आदीं सावन वेवसाय करप्यांक व्हडा प्रमाणांत अर्थीक फटको बशिल्ल्याचें मुरगाव स्टिव्ह डोअर संघटणेचे विनोद पारकोट, वास्को येरादारी संघटणेचे हेमंत शेटगांवकार, कामगार निर्यात करपी योगेश पाटिल आनी मशीनरी निर्यात करपी मिल्टन कुलासो हांचे सयत हेरांनी केल्या. धक्को नं: १० आनी ११ खाजगीकरण करून एके कंपनीक दिल्ल्यान, आमकां वेवसाय मेळपाचें बंद जालां. हाका लागून फाटल्या ४ एप्रिल सावन बंदरांतलो माल हाड-व्हर करपी वाहना चालकांनी आपलो वेवसाय बंद दवरला.
आमकां आदले वरीं वेवसाय दिवचो अशी मागणी विनोद पारकोट हांणी केल्या. तशें धक्को नं.: १० आनी ११ चेर आदले प्रमाण स्टिव्ह डोअरचो वेवसाय करपाची मागणी पारकोट हांणी केल्या. येरादारी वेवसायीक हेमंत शेटगांवकार हांणी, तीस वर्सां आदीं बापायन हांगा येरादारीचो वेवसाय सुरू केल्लो. तेन्ना सगल्या येरादारी करप्यांक योग्य तरेन वेवसाय उपलब्ध जातालो. मात जेन्नाच्यान धक्को नं: १० आनी ११ खाजगी केलो, तेन्नाच्यान आमकां जाय तसो वेवसाय मेळपाचो बंद जालो. आमचें एकूच मागणें आसा,हे कंपनीन आमचे वांगडा करार करून आमकांय आदले वरींच वेवसाय दिवचो, अशी मागणी शेटगांवकार हांणी केल्या. बंदरांत कामगार पुरवण करपी वेवसायीक योगेश पाटिल हांणी, बंदरांत दरेकल्याक काम करपाचो अधिकार आसा. मात एक खाजगी कंपनी जर सगलो वेव्हार भायल्या लोकांक दितली जाल्यार थंय आदीं पसून काम करप्याचेर उपासमारीचो वेळ येतलो. हाका लागून त्या खाजगी कंपनीन आमकांय वेवसाय आदीं आसलो तसोच दिवचो अशी मागणी पत्रकार परिशदेंतल्यान केली.
मुरगांव बंदरात वेवसाय करप्यांनी मुख्यमंत्री डॉ. प्रमोद सावंत हांची भेट घेवन, आमकां आदले वरीं वेवसाय उपलब्ध करून दिवचो अशा आशयाचें निवेदन सादर केलें. हाचेर मुख्यमंत्री डॉ. सावंत हांणी येवपी दोन दिसांनी योग्य तोडगो काडपाचें आस्वासन दिल्ल्याची म्हायती विनोद पारकोट हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
