भांगरभूंय | प्रतिनिधी
भांगरभूंय । प्रतिनिधी
वास्कोः मुरगांवांतल्या लोकांक कोळसो प्रदुशणाक लागून जावपी त्रासाची दखल घेवंन आमी मुरगांव बंदर प्राधिकरणाचो (एमपीए) अध्यक्ष डॉ एन विनोदकुमार हाची भेट घेतल्ली. त्या वेळार आमी उपस्थीत केल्ल्या प्रस्नांती अंमलबजावणी करपाचें आस्वासन ताणी दिल्लें ते प्रमाण कांय कामां चालीक लागल्यांत. आमी फकत चा पियेवपाक वा फोटो काडपा खातीर गेल्ले व्हो मुरगांवचो आमदार संकल्प आमोणकार हाचो आरोप फटीचो आसा, अशें आमोणकार हाणे फोग काडल्ल्या त्या आठ नगरसेवकांनी सोमाराक एके पत्रकार परिशदेंत सांगलें.
पत्रकार परिशदेक उपनगराध्यक्ष रामचंद्र कामत, नगरसेवक दामोदर कासकार, दयानंद नायक, दामोदर नायक, प्रजय मयेकर, लिओ रॉड्रिग्ज, नगरसेविका कृणाली मांद्रेकार, मंजुषा पिळर्णकरा हाजीर आशिल्ली. मुरगांव बंदराचे गेट नंबर णवांतल्यान जावपी कोळसो येरादारी आतां गेट नंबर एकांतल्यान जाता. ताका लागून सड्यार रावपी लोकांक कांय समस्यांक तोंड दिवचें पडटा. ते विशीं आमी विनोदकुमार हाचे कडेन चर्चा केली. मुरगांव बंदरांत कसलींय बंधना नासतना दीस- रात कार्गो हाताळणी चालू आसता. कोळसो, बॉक्सायट येरादारीक लागून भुकटी, धूल्ले प्रदुशण जाता. फातोडेर पांच तें स ह्या वेळार रस्त्यार उदक शिपडावचें. रस्त्याचे कुशीक एकठांय जाता ती भुकटी नेमान एकठांय करची. तशेंच कोळसो प्रदुशण जावचें न्हय म्हणून एमपीएन कसली वेवस्था केल्या हाची म्हायती घेवपा खातीर नगराध्यक्ष, उपनगराध्यक्ष हांच्या सयत नगरसेवक बंदरांतल्या कामाच पळोवणी करतले हें संबंदी आमी चर्चा केली अशें कृणाली मांद्रेकारान सांगलें.
पांच नंबराच्या वॉर्डांत सगल्यांत चड प्रदुशण जाता. ह्या वॉर्डाचो नगरसेवक म्हणून पालिका मंडळाचे बसकेंत हावें आवाज उठयल्लो. तेन्ना सगल्यांनी म्हाका तेंको दिल्लो. आतां लोकांचे प्रस्न मांडपा खातीर आमी एमपीएच्या अध्यक्षाची भेट घेतली. मात आमदार आमोणकार फटी मारून लोकांची दिकाभूल करता. वास्को शारांतल्यान मुरगांव बंदरांत वास्को शारांतल्यान जावपी येरादारी बंद करून ती सडा मार्गान घुंवडावपा फाटल्यान आमोणकार हाचो कसलो हेत आसा, हे जाहीर करपाचे आव्हान दामू नायक हाणे आमोणकाराक दिलां. लिओ रॉड्रिग्ज हाणे आमोणकार एक नंबराचो फटींग अशें सागून ताणे ती बेगोबेग बंद करची अशें सांगलें. आमदार जावचे पयलीं ताणे कोळसो येरादारी, प्रदुशण हे विशीं सेगीत आवाज उठयल्लो. मात आमदार जातकूच ताणे किदें केलें. हांव नगरसेवक आसलो म्हणटगीर मुरगांव बंदरांत हावें वेवसाय करचो न्ही काय किदें, अशें ताणे आमोणकाराक विचारला. आमोणकाराचेर खंडणी संबदीचे आरोप जातात ताका लागून ताच्या वांगडा आमी एमपीए अध्यक्षाक मेळपाक गेले नात अशें ताणे स्पश्ट केलें.
मुरगांव बंदराचे गेट नंबर णवांतल्या जावपी कोळसो येरादारी गेट नंबर एकांतल्यान करपाचो निर्णय घेवचे पयलीं आमोणकारान कितल्या जाणांक विस्वासांत घेतिल्ले हे ताणे स्पश्ट करचें अशें दामू कासकार हाणे सांगलें. आमोणकार आतां जागो जाला. कोळसो हाताळणी बंद जावची ना हें सगल्यांक खबर आसा. मात कोळसो प्रदुशणाचेर नियंत्रण दवोरपाची गरज आसा. कोळश्या वयल्यान आमदार आमोणकारान राजकारण करचें न्हय अशें ताणे सांगलें. आमी आवाज उठयतगीर आमोणकार जागो जाला. दरेका गजाली खातीर कमिशन घेता देखून तो कमिशन आमदार जाला. ताका लागून पक्षाची प्रतिमा इबाडटा अशें प्रजल मयेकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
