भांगरभूंय | प्रतिनिधी
संकल्प आमोणकार : उदकाच्या टांकयां खातीर बुन्यादी फातर
भांगरभूंय । प्रतिनिधी
मुरगांव : मुरगांवचो पियेवपाच्या उदकाचो प्रस्न सासणाचो सोडोवचे खातीर उदकाची नवी पायपलायन घालपा खातीर सरकारी दरबारांत प्रस्ताव सादर केलां. बेगिनूच त्या कामाक सुरवात जातली, अशें आमदार संकल्प आमोणकार हांणी सांगलें.
मुरगांवच्या सडा, जेटी, रुमडावाडो, बोगदा वाठाराक सध्या भौशीक बांदकाम उदका विभागांतल्यान सद्दां 10 एमएलडी उदकाची पुरवण जाता. ताका लागून ह्या वाठारांत पियेवपाच्या उदकाचो प्रस्न गंभीर जाला. 800 क्युबीक मिटरांच्यो दोन उदकाच्यो टांकयो थंय बांदले उपरांत, 12 एमएलडी उदकाची पुरवण करपाक मेळटली आनी सगल्यांक फावोशें उदक मेळटलें, अशें आमोणकार हांणी सांगलें.
मुरगांव सड्यार भौशीक बांदकाम पियेवपाचें उदक विभागा खाला दोन 800 क्युबीक मिटर तांकीच्यो उदकाच्यो दोन टांकयो बांदपा खातीर आमदार आमोणकार हांचे हस्तुकीं बुन्याद घातली. ह्या वेळार मुरगांवचे नगराध्यक्ष गिरीश बोरकार, पियेवपाच्या उदका विभागाचे कार्यकारिणी अभियंता वसुराज करमलकार, सहाय्यक अभियंता स्वाती साखरदांडे, सहाय्यक अभियंता नरेश पैगिणकार, सहाय्यक अभियंता यशवंत नायक, कनिश्ठ अभियंता जॅसन वाज, नगरसेविका श्रध्दा आमोणकार, रवींद्र भवनचे अध्यक्ष जयंत जाधव, उपाध्यक्ष डॉ. धमेंद्र प्रभूदेसाय, आदली नगराध्यक्ष अर्चना कोचरेकार आनी हेर मानेस्त तशेंच थळावे लोक हाजीर आशिल्ले. सडा वाठारांत 3552 घरां आसात. तांचो पियेवपाच्या उदकाचो प्रस्न सोडोवप ही म्हत्वाची गरज आसा. हे खातीर 1 कोटी 57 लाख रुपया खर्च करून 800 क्युबीक मिटरांच्यो दोन टांकयो बांदतात. ह्या टांकयांक लागून सडा वांगडाच भोंवतणच्या वाठारांतलो पियेवपाच्या उदकाचो प्रस्न सुटावो जातलो. ह्यो टांकयो बांदून पुराय जावपाक वर्स वतलें. तरी लेगीत आपूण टांकयो बांदपी कंत्राटदाराक विनवणी करतां, ह्यो टांकयो आठ ते णव म्हयन्यां भितर बांदून पुराय करच्यो. कारण सडा आनी हेर वाठारांत मार्च, एप्रील आनी मे म्हयन्यांत उदकाचो उणाव जाता. हे खातीर कंत्राटदारान झुजा पांवड्यार काम करचें, असो उलो आमदार आमोणकार हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
