भांगरभूंय | प्रतिनिधी
नंदादीप रावतः एफ एल गोम्स रस्त्याची रुंदी 17 वयल्यान 7 मिटर जावपाची भिरांत
भांगरभूंय । प्रतिनिधी
मुरगांवः वास्को शारांतल्या राष्ट्रीय म्हामार्गाच्या मुरगांव बंदरांत वचपी उड्डाण पुलाचेर अपर रॅम्प करप म्हणल्यार शाराचो इबाड करपा सारकें आसा. वास्को शार बऱ्या सुविधांनी सुसज्ज आसा. जर एफ एल गोम्स रस्त्याचेर अपर रॅम्प उबारलो जाल्यार शारांतली येरादारी आनीक वाडटली. तातूंत चड करून मुरगांव, बायणाच्या लोकांक त्रास जातलो, अशें मुरगांवचे आदले नगराध्यक्ष नंदादीप रावत हांणी सांगलें.
सगळ्या साधन सुविधांनी युक्त आशिल्ल्या वास्को शाराक एमपीए, गॅमन इंडिया आनी थळाव्या लोकप्रतिनिधी गिराण लावचे खातीर एफ एल गोम्स रस्त्याची आवतिकाय करपा खातीर फुडें सरल्यात. सरकार रस्त्याचें रुंदीकरण करपा खातीर दरेक यत्न करता, पूण एफ एल गोम्स रस्त्याची रुंदी 17 मिटरा वयल्यान बद्द 7 मिटरांचेर हाडपा खातीर थळावे लोकप्रतिनिधी एमपीएच्या सांगण्यान फुडें सरला, अशी टिका रावत हांणी केली. राज्य सरकारान सगळयांत आदीं वास्को शाराक गरजेचे आशिल्ले प्रकल्प पुराय करचे. गरजे भायर एफ एल गोम्स रस्त्याचो इबाड करचो न्हय. दक्षीण गोंय जिल्होधिकारी, मुरगांव उपजिल्होधिकारी, अधिकाऱ्यांनी एफ एल गोम्स रस्त्याचेर अपर रॅम्पाचें काम सुरू जावचे आदीं बंद करचें. कारण पावसाळो तोंडार पावला, एफ एल गोम्स रस्तो खणपाक सुरवात केल्यार थंय दुसरी स्मार्ट सीटी जावपा पसून कोणूच आडावपाक शकचो ना. हो अपर रॅम्प शारांतल्यानूच कित्याक जाय, हाची म्हायती एमपीए आनी गॅमन इंडिया हांणी संबंदीत विभागाक तशेंच मुरगांवच्या लोकांक भौशीक जनसुनावणे वरवीं दिवपाची गरज आसा, अशें रावत हांणी म्हणलां.
अपर रॅम्प घातक थारूं येताः नंदादीप रावत
वास्कोचो एफ एल गोम्स रस्तो हो राष्ट्रीय म्हामार्ग न्हय. ह्या रस्त्याचे कुशीक पुलीस स्टेशन, मशीद, नुस्त्यां मार्केट, मुरगांव नगरपालिका इमारत आनी हेर आस्थापनां आसात. ताका लागून हो अपर रॅम्प घातक थारूं येता. संबंदीत विभागांक अपर रॅम्प करपाचोच आसा जाल्यार इंडियन ऑयली वटेन घुंवडावन टीबी कुन्हा चौकांत उबारचो, अशें आदले नगराध्यक्ष नंदादीप रावत हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
