भांगरभूंय | प्रतिनिधी
मुबारक खजिन्याचो जाळवणदार आशिल्ल्यान सगलें राजकारभारी ताचे कडेन दुबावीत नदरेन पळयता. हें ताचें लक्षांत आयलें आनी ताणें राजा इंद्रदेवाल्या म्हालांत वचून सगळ्यो चाव्यो राजाचे सुवादीन केल्यो. राजालें पांय धरीत ‘हांव खजिनदार म्हणून मोतयां माळ गायब जावपाक जापसालदार थारतां, पूण महाराज हांव अल्लाचो सोपूत घेवन सांगतां ती माळ हांवें चोरूंक ना, आनी कोणें चोरल्या तेंवूंय हांव नकळो’. अशें म्हणीत एक धवी चादर जमनीर पातळिली .
आनी तिचेर धोंपरार बसून हाताचे दोनूय पंजे एकठांय केले आनी दोळे धांपून वयर पळयत पार्थना करुंक लागलो ‘हे परवरदीगार …अल्ला… मालिक मै पाच बार नमाज अदा करता हुं मैने तो मोतियोंकी माला नही चुरायी है .. न मेरे मन में चोरी है…अगर जिस किसने भि मोतियोकें माला चुरायी है उसको 24 घंटे कें अंदर वो वापस करनेंकी समज दे दो और मेरे उपर जो चोरी का दाग लगाया जा रहा है उसको मिटावो “
मुबारकाली प्रार्थना आयकून राजाक ताची भावना दुखवल्याचे समजलें. राजान ताका धीर दियत म्हणलें ‘मुबारक जरी राज दरबारांत तुवेंच माळ गायब केल्या अशें सगळ्यांक दिसता, तरीय म्हजो तुजेर विस्वास आसा’. राजाली उतरां आयकून मुबारकाक धीर मेळ्ळो. तरी पूण राजदरबारी आतां ताचे लागीं पयलीं भशेंन उलय नासले. ताका पळोवपाची नदर वेगळी जाल्या अशें ताका पावला कणकणीं जाणवतालें.
ज्या दिसा मोतयां माळ गायब जावपाचो बोवाळ जाल्लो, तेच रातीं राणी इंदुमतीक रामायण वाचपाचें येवजलें. तिणें ग्रंथ वाचपाक हातांत घेतलो. याद उरपा खातीर ज्या पाना आड घालून दवरिल्ली माळ पळोवन ती खोशी जाली आनी बेगोबेग माळ मेळपाची खबर राजदरबारांत कळीत केली.
राजान दरबारांत मुबारकाक आपयलो आनी सगल्यां भर राजदरबारांत मोतयांची माळ आनी खजिन्याच्यो चाव्यो ताचे हातांक दियत म्हणलें ” मुबारक तुका ह्या मोतयां माळेक लागून खूब मानसिक त्रास सहन करचो पडलो, पूण म्हाका तुजेर विस्वास आसलो. जें किदें घडलें तातूंत तुजी कसलीच चुक नासली. तेन्ना राणी भानुमतीच्या वतीन हांव तुजी चुक मागतां. नीलम बाग हांव हया संवसारांत आसा मेरेन तूं निलम बाग सोडचो ना अशें वचन मागतां ‘.
मुबारकान दोन वर्सांच्या कामा मजगतीं केन्नाच रजा घेवंक नाशिल्ली. एक दीस मुबारक निलम बागेंत आयलो ना म्हूण राजान ताचे घराकडे वासपूशे खातीर सेवकाक धाडलो. तेन्ना कळ्ळें मुबारक सवंसारांतल्यान अंतरला. आयकून राजाक खूब दूख्ख जालें. मुबारकालें मुखामळाचें निमणे दर्शन घेवपाक ताचे जनाज्याची वाटेर वाट पळोवंक लागलो. खूब कळाव जालो म्हूण राजान सेवकाक चवकशी करपाक धाडलो ! सेवकान घरांत वचून जनाज्या विशीं मुबारकालें कुडी कुशिक बायलेक विचारतगर सांगलें ” कफन खरेदी करपाक पयशे ना “……..!
राजाक सेवका वरवीं ही गजाल आयकून खूप वायट दिसलें. मनांतल्यान राजा रडटालो राजान सेवकाक विचारलें ” हांव मुबारकाक पयशें दितालो ते तो किदें करतालो “. नोकरान जाप दिली ” मुबारक ते सगले पयशे फकीर, साधु, संत, गरीब हांकां दान करतालो”.
‘मागीर तो आपल्या बायल भुरग्या पोट कसो भरतालो तर ‘?. राजान परतून प्रस्न केलो.
‘तुमी सदा जें ताका जेवण दिताले तें जेवण, आनी राजवाड्या वयलें उरिल्लें जेवण तो सांजे आपल्या घरा घेवन येतालो ‘. नोकरान जाप दिली
‘तशें जाल्यार आमचो जेन्ना उपवास आसता त्या दीस मुबारक आनी ताची बायल भुरगीं कशीं पोट भरतालीं’? ‘म्हाराज त्या दिसा खंय तो आनी ताचें कुटुंब उदक पिवन न्हिदतालीं ‘.
हें आयकून राजाच्या दोळ्यांतल्यान दुकांच्यो झरी व्हांवपाक लागल्यो. राजान नोकरांकडसून कफन आनी निमण्या संस्कारा खातीर लागपी सगळ्यो वस्तू हाडून घेतल्यो आनी फर्मान सोडलें निलम बागेतल्या राजवाड्यातलो प्रामाणीक खजिनदार मुबारकाल्या जनाज्याक म्हजे सयत तीन दरबारी भुजां दितले, मुबारकाचो जनाजो पुराय राज सन्मानान जातलो’. राजान आपले तकलें वयली पगडी सोडोवन माथ्यार धवो रुमाल बांधलो.
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
